Caso a bay awor pa Straf Commissie
ORANJESTAD (AAN): Cos no a bay bon durante e wega entre S.V. Atlantico Deportivo contra di S.V. Arsenal.
Durante di e partido cu a tuma luga diahuebs ultimo 23 di maart entre S.V. Atlantico Deportivo vs S.V. Arsenal den Copa Division Uno, e referee mester a para e wega na di 82 minuut pa motibo di bringamento cu a tuma luga entre e hungadonan.
A base di e rapport di e referee e hungadonan y miembro di e clubnan envolvi a haya suspension temporal di AVB y a worde informa di esaki tambe.
Fuera di esey, e caso a worde manda pa Straf Commissie, cu ta un entidad independiente di AVB, pa tuma un decision riba e caso aki despues di duna oportunidad na tur esnan envolvi pa duna nan banda di medaya.
AVB ta nota cu ultimamente tin mas violencia riba veld y rond di e deporte di futbol y esaki ta di lamenta. Pa e motibo aki siman pasa AVB a yama un reunion cu caracter di urgencia pa discuti e topico aki cu e dirigentenan di e clubnan cu lo tuma luga diaranson 29 di maart 2023.
E meta di e reunion aki ta pa hunto, AVB y esnan concerni yega na un medida cu lo worde implementa pa evita cu e situacion aki escala, pero tambe pa disciplina esnan cu no ta mantene nan mes na e normanan deportivo y buena conducta.
