Como 237 paki a wordo confisca
SANTO DOMINGO: Tanto Ehercito Dominicano y Marina Dominicano a confirma, cu dos di nan miembronan a resulta di ta involucra den un tiroteo cu oficialnan anti-droga di DNCD, unda a logra finalmente confisca 237 paki yena cu cocaina. E caso a socede na municipio di Juan Dolio den provincia San Pedro de Macoris na costa zuid di e pais.
E oficial di Marina Dominicano a wordo identifica como Capitan di Fragata, esta oficial Kelvin Agustin Mejia Herrera. Mesora autoridadnan a suspende e Capitan Mejia Herrera di tur su funcionnan. Pues su funcion militar lo no bay interveni cu e accionnan di Husticia cu ta bay investig’e awor.
E otro oficial di Ehercito Dominicano a wordo identifica como Sargento Major Jose Luis Sanchez Velez, kende tambe ya caba a wordo suspendi, y ta deteni y encarcela door di Fiscal.
Nan a aresta un civil tambe, esta Elvin Daniel Lawrence.
Marina Dominicano a laga sa tambe cu nan lo bay aplica tur regla disciplinario vigente sin distincion riba nan Capitan. Esey ta cu si un oficial di nan ta involucra nan mes den actonan criminal y contra ley, dañando e imagen di e institucion militar.
