ORANJESTAD (AAN) – Chofernan di Arubus, den e diferente rutanan, a informa e usuarionan cu tabata subi bus Diadomingo cu a pasa, cu awe lo no tin servicio di Arubus, te cu despues di 1’or di atardi, y esaki ta conta tambe pa bus escolar.
Usuarionan a keda gradici cu e biaha aki e chofernan a informa nan, pa no haya sorpresa y wak con nan ta regla nan transporte pa trabao, sea usando
autobus y buscando colaboracion di bisiña of famia mes.
Specialmente pa e muchanan di scol, mayornan lo tin cu wak ki alternativa tin pa nan, pa nan yega scol mainta. Generalmente cada klas tin un chat unda e alumnonan ta comunica un cu otro. Esaki por ta un bon opcion pa mayornan conecta entre nan mes, pa mainta esnan biba den nan vecindario, cu ta hiba yiu scol den auto, por duna un man na esnan cu no tin auto den cas, y cu ta depende por completo di bus escolar.
Y mayornan cu tin nan mes transporte pero ta paga bus escolar pa nan yiunan, por adapta nan orario di salida mainta, pa haci e espacio necesario pa laga nan yiu na scol.
Gerencia di Arubus NV tambe a duna di conoce cu nan servicio lo por sufri retraso y/of interupcion entre 4 am te 1 pm esaki den conexion cu un manifestacion cu lo por tuma lugar.
