Pa por cumpli cu e Ley di Kinderopvang
- Pa cumpli cu ley tin di haci varios rekisito cu ta costa placa
ORANJESTAD (AAN): Un reunion a ser teni recien cu diferente doño di Centro di Cuido pa brinda pueblo di Aruba informacion tocante aumento di prijs di cuido di mucha.
E anochi aki nan a elogia tur esnan cu a y ta sigui lucha pa e cuido di nos muchanan na Aruba por ta uno di calidad. Nan como doñonan di diferente centro di cuido ta di acuerdo cu Ley di Kinderopvang y tur cambio necesario cu mester haci pa mehora e cuido di muchanan. E doñonan local ta haciendo nan best di ora cu e ley a drenta den vigor pa cuminsa haci e cambionan necesario cu legislacion ta exigi.
Segun Marelyn Martijn, pa por cumpli cu e diferente rekisitonan cu ley ta rekeri, claramente por compronde cu esey lo costa cen. Entre otro pa infrastructura, inverti, material, extra personal y pa e motibo aki e doñonan a tuma e decision cu nan tin cu aumenta e suma di nan tarifa pa cuida mucha.
E motibo principal pa e aumento di prijs ta debi na e ‘ratio’ cu ta para den ley.
‘Ratio’ ta un cantidad specifico di mucha segun edad cu por worde cuida door di 1 leidster. E ratio a worde implementa pa por brinda un mihor calidad di cuido pa nos muchanan den un grupo mas chikito di mucha. E ratio ta lo siguiente: (*) 0-1 aña 6 baby pa leidster. (*) 1-2 aña 10 mucha pa leidster. (*) 2-3 aña 12 mucha pa leidster. (*) 3-4 aña 13 mucha pa leidster. (*) 4-6 aña 14 mucha pa leidster. (*) 6-12 aña 16 mucha pa leidster.
Afecta nan entrada mensual: DIARIO a compronde cu nunca antes Centronan di Cuido a traha cu un ‘ratio’. Cada un centro di cuido tin nan cantidad di mucha cu ta cubri e gastonan di e scol pa e por sigui opera. E cantidad aki no solamente ta pa cubri e gastonan pero tambe pa cover tur aña na luna di July ora e muchanan di Peuterklas ta bay Kleuter y nan ta perde un gran cantidad di mucha.
Akinan e entrada ta baha drasticamente y ta tuma algun luna pa haya mucha back.
Tambe ta pasa cu mayor ta kita nan yiu for di centro di cuido sin aviso di un momento pa otro y esakinan ta loke ta afecta nos entrada y pues pa e motibo aki nan no ta traha cu un ratio.
Semper e Centronan ta traha cu un cantidad cu por cubri nos gastonan pa e bahada di entrada na luna di Juli y ora mayor kita na yiu sin pre-aviso. Na final di luna nan como dunador di trabao si mester cumpli cu tur gasto di e centro, sin importa cu tin menos
mucha of no.
Awor cu nos ta worde exigi pa traha cu e ratio cu ta un cantidad specifico nos ta bay tin cu haci algun cambio pa por cumpli esaki.
Entre otro busca extra personal pa cubri e extra muchanan cu normalmente nan ta traha cune y tur esaki ta costa e Centronan hopi placa, por ehemplo salario pa e leidster, belasting, SVb.
Centro di cuido ta un negoshi priva y tin su gastonan cu mester cumpli cune pa por sigui brinda nan servicio. Si ley ta exigi centronan traha cu menos mucha pa cada leidtser nos tin tres opcion pa haci esaki posibel.
(1) Sea e Centronan ta traha cu e cantidad cu ta worde exigi den ley cual ta menos mucha. E consecuencia ta cu nos como crechenan no lo por cubri nos gastonan mas mirando cu e entrada lo ta menos y na final mester cera nos crèche y no por sigui brinda cuido pa nos muchanan.
(2) E Centronan ta traha cu e cantidad cu ley ta exigi cual ta menos mucha. E consecuencia ta cu nos entrada lo bira menos y e prijsnan di cuido mester subi pa nos por cubri nos gastonan mirando cu nos mester manda algun mucha cas pa por traha cu e cantidad exigi.
(3) Centronan ta traha cu e cantidad cu ley ta exigi y mester busca extra leidster pa cubri e muchanan cu ta sobrepasa e cantidad di exigencia. E consecuencia ta cu nos mester paga un salario extra, belasting y SVb y e prijsnan di cuido mester subi pa nan por cubri e gastonan extra.
Nan a splica cu Centro di Cuido di Aruba tin hopi aña ta purba mantene nan prijs abou teniendo na consideracion pa nos mayornan. Pero entrante 1 di Augustus 2024, e tarifa lo bay subi.
