ORANJESTAD (AAN): E accion di donacion cu FAVI a cuminza cune Diahuebs ta uno hopi importante pa por ricibi fondonan pa entre otro yuda clientenan di e fundacion.
Durante un conferencia di prensa Diahuebs mainta, Charlene Marchena a duna un splicacion riba tur locual ta wordo haci cu e placa cu FAVI ta ricibi como donacion.
Segun Marchena, FAVI ta duna su clientenan diferente servicio cu ta cuminza caba na momento cu e fundacion haya un ‘aanmelding’ di un cliente y e wordo acerca pa un trahador social.
“E persona ta haya bishita na cas despues di ta bin chekeo di bista, cu tambe ta un di e servicionan cu nos ta duna pa haya sa con e persona ta mira”.
Si wordo determina cu e ta un cliente pa FAVI, nos ta habri e portanan pa e por cuminza cana su caminda den FAVI, esta e por haci uso di nos actividadnan, nos sistemanan educativo y nos programanan, segun Marchena.
El a splica cu FAVI tin programanan psico-social cu ta wordo haci pa trahadornan social.
Tin tambe les di gym, actividadnan di obranan di man y tambe weganan di mesa cu ta wordo haci tambe na FAVI.
“Nos ta duna tambe guia trempan na nos muchanan, cu ta un parti hopi importante na FAVI pasobra nos como hende grandi ta bay, pero nos muchanan ta e futuro”, segun Marchena.
El splica cu ora cu un mucha yega na FAVI na un edad hopi hoben, ya caba e ta cuminza haya su guia trempan te cu 4 aña y despues e ta sigui na scol regular of scol special, dependiendo di e capacidad di e mucha.
Tin muchanan di scolnan basico y scolnan secundario, incluyendo HAVO, cu ta ricibi guia for di docentenan ambulante via FAVI.
“Nos ta duna tambe lesnan adapta manera por ehempel lesnan di cushinamento, mirando cu hopi biaha ora cu un persona bira ciego e no ta tribi di haci uso di cushina manera cu e tabata haci prome”.
Por ehempel miedo pa corta man y miedo pa uza e stove, pues pesey nos ta siña e persona con pa na un manera adapta toch haci uso di cushina, segun Marchena.
El a indica cu riba peticion di cliente por yuda nan cu otro aspectonan di nan bida diario tambe manera con pa dobla paña, con pa warda placa y con pa drecha cama.
Tambe e clientenan ta haya lesnan adapta incluyendo lesa cu uso di braille, cu ta siña lesa cu bo dedenan, via bukinan special.
E clientenan por haya tambe lesnan adapta di computer y di type, haciendo uso di programanan di papia via computer.
