Segun Minister di Enseñansa, Gerlien Croes:
ORANJESTAD (AAN): Minister di Enseñansa, Gerlien Croes, a expresa su preocupacion den un entrevista reciente cu DIARIO tocante e retonan cu docentenan na Aruba ta confronta den scol, particularmente riba e bienestar social-emocional di muchanan.
Segun e minister, docentenan ta enfrenta e reto pa haya un balansa entre nan tarea educacional y e atencion cu cada vez mas ta necesario pa e parti social-emocional di alumnonan. Den cierto situacionnan, e realidad na scol ta bira asina compleho cu hasta tin docentenan cu ta sinti nan mes insigur den nan ambiente di trabao.
Croes a señala cu no tur scol ta dispone di camara di vigilancia of di tur e recursonan necesario pa garantisa un ambiente completamente sigur. Sinembargo, segun e, mayoria di scol publico actualmente tin personal di siguridad na entrada, cu por interveni ora un situacion amenaza di sali for di control.
Riba e parti social-emocional, Minister Croes a indica cu Gobierno ya a haci diferente inversion pa fortalece e sosten disponibel. Specialmente na MdC. A crea espacio pa mas psicologo, logopedista y profesionalnan di apoyo educativo, cu por contribui na evaluacion di muchanan y ofrece nan guia y hermentnan pa atende cu nan necesidadnan.
No obstante, e minister a reconoce cu e efecto di e medidanan aki ainda no ta suficiente visibel den e veld di enseñansa. Aunque lista di espera a disminui, segun Croes, ainda tin hopi di e mesun kehonan y necesidadnan ta wordo expresa door di scolnan.
Pa e minister, solamente sigui test y evalua muchanan no ta suficiente pa soluciona e problematica. Ta necesario tambe pa acerca mas e realidad diario den scol y ekipa docentenan cu e conocemento y hermentnan practico pa nan por reconoce y atende cierto situacionnan social-emocional den klas.
Den e contexto aki, Croes a anuncia cu pronto lo inicia un trayecto nobo di profesionalisacion, unda docentenan lo haya oportunidad pa participa na curso y workshopnan. E meta ta pa nan por sigui desaroya nan mes profesionalmente y, na mes momento, ricibi mas sosten pa e retonan cu nan ta confronta diariamente na scol.
Segun e minister, fortalece e capacidad di docentenan ta un paso esencial pa crea un ambiente escolar unda tanto enseñansa como bienestar di e alumno por haya e atencion necesario.
