ORANJESTAD (AAN): Un campaña di firma a cuminza Diaranson cu e unico meta: Exigi retiro di e directiva actual di SVOA, cu ta e fundacion cu ta maneha Colegio Arubano den Vondellaan.
Ta parce cu e disco a bolbe ripiti su mes, tempo cu Ministro Rudy Lampe tabata encarga cu enseñanza.
Net awor cu tur docente y alumno ta contento cu a haya un Rector hopi dinamico y atento pa nan tur, esta Tim Croes, diripiente e directiva di SVOA a comete e pifia di retira e Rector anto pa un cos kens.
Pesey mes, e respaldo di tur docente riba Diaranson mainta na Colegio Arubano tabata inmenso! Docentenan ta sostene Tim Croes totalmente. Pero SVOA si a keda cu un nubia scur riba nan colga.
Sindicato Simar a sostene e docentenan riba Diaranson mainta, como cu nan a nenga di bay duna les. Di e forma aki nan ta manda un mensahe cla y raspa tambe pa Sr. Rosenstand di SVOA, cu su decision adhoc tabata uno cu ningun hende ta acepta.
Docentenan di Colegio Arubano a presenta tur na preto bisti, figurando asina e nubia scur colga riba cabez di SVOA. E Sindicato desde segundo mitar di 2021 a cuminza haya indicacion cu tin problema y cu SVOA no ta haciendo su best. Segun Simar, nan a busca forma pa intermedia. Pero loke docentenan ta desea pa henter Directiva di SVOA bay cas.
Nan a keda asombra pa e forma con SVOA a atende reunion riba Diamars, unda tensionnan a bay halto y docentenan a keda asombra pa e “atake di chimby” cu esnan den SVOA a haya, y a hasta cuminza pusha porta y casi lastima docente na su pia.
Manera ta conoci, SVOA tambe ta cay parcialmente bao di guia y direccion di Obispado di Willemstad.
Y awor, Docentenan ta decidido pa keda sostene nan Rector, cu nan ta haya a wordo suspendi inhustamente. Pesey awor ta e Docentenan ta exigi retiro di presidente di directiva, Ernesto Rosenstand. Hasta un campaña di firma a start riba e website di change.org unda docente- y mayornan tambe ta poniendo nan firma.
