ORANJESTAD (AAN): Considerando cu un mucha mester ta plenamente prepara pa un bida independiente den un sociedad y mester ta educa cu e spirito di e articulonan proclama den e Tratado Internacional di Derecho di Mucha, Departamento di Mucha y Hoben (DMH) kier duna atencion na Articulo 30.
Tur mucha tin derecho na educacion (articulo 28) y tambe e derecho di siña y uza su idioma materno (articulo 30). Idioma ta biba cerca un mucha desde cu e ta den bariga di su mama y segun su edad y capacidad, e desaroyo di su idioma ta tuma lugar.
Idioma materno: Idioma materno ta e prome idioma cu un hende ta siña durante su prome añanan di bida y ta uz’e como un instrumento fundamental pa pensa, expresa y comunica. E idioma cu abo como mayor ta papia cu bo yiu(nan), ta e prome lenga cu e ta siña. Ta su prome conexion cu bo, e sobra di famia, su cultura y su sociedad. Ta e prome idioma cu e ta uza pa siña tocante e mundo cu ta rondon’e.
E lenguahe ta un di e aspectonan fundamental den e desaroyo di un mucha. E ta e arma maraviyoso, cu ta habri miles di porta na otro conocemento y ta e herment di relacion cu otro, sin laga afo cu e ta permiti nan tin interaccion adecuadamente.
Adkisicion di idioma: Mientras un mucha ta adkiriendo su idioma, e ta organisando su percepcion di realidad tambe y esaki ta compaña constantemente e accion di e mucha. E periodo crucial pa un mucha adkiri idioma ta entre tres y cinco aña, unda e muchanan ta siña comunica oralmente cu otro hende, teniendo un lenguahe menos amplio den comparacion cu un adulto.
E desaroyo aki ta evoluciona netamente den e etapa preescolar, unda mester percura pa tin bastante apoyo y stimulacion den e desaroyo di idioma, tanto na scol como na cas. E stimulacion y enseñansa di idioma aki ta sigui fortalece cu tempo, te ora cu e mucha por comunica cu mayor fluidez y claridad.
Educacion preescolar: Referiendo na e parti ariba, educacion preescolar tin un papel sumamente importante. Ya cu e ta duna e mucha e oportunidad di papia y scucha tocante diferente tema cu ta encera su entorno familiar, teniendo e oportunidad di scucha storia, canta, bisa rima, describi imagen, situacion of concepto, cu ta yud’e amplia su vocabulario cada biaha mas y mas.
Cu otro palabra, educacion preescolar ta expande su mundo, su nificacion, e vocabulario y e structuranan linguistica cu nos ta expone e muchanan na dje.
Aki ta unda ta crea e necesidad di papia tocante diferente tema y di explora diferente manera di uza e idioma, buscando esun mas apropia pa cubri su necesidadnan di expresion.
Crea espacio pa experiencia comunicativo: Cada experiencia comunicativo cu ta involucra un mucha, sea ta den contexto familiar of escolar, ta permitie pone den practica e conocementonan, cu ya e ta posee y na mesun momento adkiri nobo. Asina aki e mucha ta enrikece su idioma oral, pues ora cu e experiencianan ta significativo y tin un meta, ta resulta facil pa e mucha siña e idioma.
Si e experiencianan comunicativo ta carece di relevancia y significado, e idioma ta bira complica pa e mucha siña e idioma oral. Amplia su vocabulario cu e actividadnan comunicativo, ta permiti e mucha logra un desaroyo integral, es decir cognitivo, afectivo, fisico y specialmente social, locual tin como resultado e adkisicion di confiansa y siguridad p’e desenvolve den diferente ambito.
