Drs. Shailiny Tromp-Lee:
ORANJESTAD (AAN): Ayera mundo henter, incluyendo Aruba, a conmemora Dia Mundial di Diversidad Cultural pa Dialogo y Desaroyo, un iniciativa di UNESCO cu ta resalta e balor di inclusion y cohesion social.
Parlamentario Drs. Shailiny Tromp-Lee (Fraccion MEP) ta subraya cu pa Aruba, un isla caminda mas cu 100 nacionalidad ta biba y traha hunto, e dia aki tin un esencia hopi profundo, pero e ta bini tambe cu un gran responsabilidad. “Nos mester sinti nos mes orguyoso cu Aruba structuralmente ta un ehempel bibo den Caribe di con diferente cultura, idioma y tradicion por convivi na un manera pacifico,” Tromp-Lee a declara. E parlamentario ta splica cu e mescla cultural aki no solamente ta enrikece nos identidad como pueblo, sino cu e ta e motor tras di nos forsa laboral y nos pilar economico principal, cu ta turismo.
Esfuerso continuo pa un berdadero inclusion
Sinembargo, mietras nos ta celebra nos gastronomia varia, nos multilingualismo y nos herencia multicultural, e Parlamentario ta recorda nos riba e advertencia cu expertonan di UNESCO ta haci structuralmente: diversidad so no ta suficiente. “Pa un berdadero inclusion existi, e sociedad mester wordo construi riba fundeshi di igualdad social y oportunidadnan husto pa tur hende,” Tromp-Lee a enfatisa.
Den e contexto aki, e mandatario ta resalta cu e debate no mester keda solamente na e parti superficial di e celebracion, sino hiba e discusion un paso mas leu. Esaki ta encera percura pa e forsa laboral multicultural cu ta sostene nos economia nan derechonan laboral ta keda cumpli cu nan, cu nan ta keda protehi y keda trata husto, y cu nos sistemanan di educacion ta fomenta un bida social formativo pa nos hobennan.
Proteha nos identidad
Tromp-Lee ta conclui expresando cu e meta principal mester ta semper pa mantene un balansa caminda nos ta habri pa mundo, compartiendo cu respet mutuo, mientras nos ta salvaguardia y duna balor na nos propio identidad Arubiano. “E diversidad cu ta caracterisa nos, mester ta structuralmente un fuente di fortalesa cu ta uni nos, no un motibo pa division. Ban sigui traha hunto pa un Aruba caminda cohesion social, husticia y respet ta central den cada aspect di bida,” e Parlamentario a finalisa bisando.
