E lo pasa na October den Cas di Cultura
ORANJESTAD (AAN): Durante luna di October venidero, Aruba lo bay cera conoci cu un obra teatral di caliber halto, cu lo bay keda sigur marca den historia, y cu lo por kizas competi den futuro tambe na festivalnan internacional di teatro.
Un obra teatral cu decór inigualable riba stage di Cas di Cultura, y lo bay combina cu diferente avance tecnologico tambe pa haci e obra “Spirito” bira esun cu tur hende lo bay papia y memoriza como esun di mas grandi di 2023.
Durante un conferencia di prensa convoca den sala grandi di Cas di Cultura, e directora di e obra teatral, e dama Hilda Hellwig a indica cu sinceridad, cu nunca el a pensa cu e lo bay ta dirigiendo un obra teatral na Aruba. El a splica cu e tabatin un masterclass cu actornan di Aruba, y keda sorprendi con talentoso y maraviyoso nan ta, y el a cuminza puntra su mes ta kico e lo por haci cu e artistanan ey siguiente biaha.
Tambe e ta hopi interesa den historia, y hasta loke ta pasando den sociedad, y a cuminza check tur detaye di Aruba. Cu su conocemento, el a logra haya un obra teatral ideal pa e grupo di Arubianonan, y cu lo bay ta hopi actual y tambe lo entretene tur hende. Esey tabata e empuhe cu a pone Hilda Hellwig cuminza traha pa haci un obra teatral na e isla.
E traduccion y script: Hellwig a indica cu e prome cos cu el a haci den preparacion pa e chens di dirigi un obra teatral riba e isla, tabata pa topa cu e conocido Ramon Todd Dandaré. E ciudadano Todd Dandaré di berdad a compronde e importancia di e storia di Henrik Ibsen y e obra. E obra aki ta un di e storianan mas gusta y aprecia di e autor Henrik Ibsen, y e tabata un exito escandaloso desde cu el a wordo lansa na 1881, tempo cu tabatin hombernan ta sali na careda for di teatronan unda e obra tabata pasando. E ta spera cu na Aruba, lo no bay tin bringamento den publico. Aki e directora Hellwig a hari un poco, pero a mustra cu e storia aki lo por pone bo curason cunsumi un poco.
Pa Hellwig e parti mas importante ta pa e storia aki ta na Papiamento, pa asina por tine na un nivel halto pa e drama aki bira uno fantastico. Sinta den stul di Cas di Cultura y scuchando e storia, lo bo bay pasa den un aventura.
E directora Hilda Hellwig a mustra cu e ta hopi agradecido na e bon trabao di Ramon Todd Dandaré pa a traduci y adapta e storia pa Aruba.
Spirito ta toca e tema di relacionnan familiar usando drama, humor, picardia, intriga y tension. Pesey publico di edad 16 bay ariba so ta wordo permiti.
E storia ta cu Famia Alving, un famia cu “moda”, ta bezig ta deal cu un pasado cu ainda ta sigui nan den presente. Tur e personahenan tin nan propio muchila di problema, reto y secreto y riba un dia tur cos ta wordo revela. E storia, originalmente di Henrik Ibsen, e tata di teatro moderno, ta specialmente scohi pa Aruba door di directora sra. Hellwig, cu a mira e contexto di Aruba y e temanan social cu ta reina. Sra. Hellwig a situa e storia den añanan 1980, e dianan di gloria di e novelanan di Venezuela y Latino America. Asina, manera un novela, cu hopi suspenso e storia ta wordo treci. Sra. Hellwig ta un pionero di teatro “avant garde”, p’esey por spera un manera unico di conta e storia aki. Tambe lo tin un décor spectacular, special traha pa esaki
