*E actividad di concientizacion pa aña 2025
ORANJESTAD (AAN) – Directora di Respaldo, señora Caroline Hart, finalizando su entrevista cu Matutino DIARIO, a menciona cu tur aña e Institucion ta organiza un actividad grandi pa concientizacion di Salud Mental.
Aña pasa tabata e “Let’s Move pa Mental Health” cu e “walk and run” y tur aña ta na October. Aña pasa tabata dia 10 di October cu ta e Dia Mundial di Salud Mental.
“E aña aki nos ta bay haci un song festival, yama ‘Let’s Sing pa Mental Health’ y e ta bay ta Diasabra 11 di October, na Aruba Hilton Bollroom. Mas informacion nos lo comparti cu prensa, pero pa aworaki nos ta cuminza cu anuncia esaki”, señora Hart a informa.El a gradici Hilton Hotel cu a pone disponible su ballroom pa e bunita causa aki.
El a sigui elabora tambe tocante nan Fact Team y con nan ta moviliza pa bishita pashent.
“Actualmente nos tin nos Fact Team, esun pariba y esun pabao, pa eigenlijk cover henter Aruba. Aworaki, e enfermeronan specializa ta bay cu nan auto y tur e remedinan y material di trabao, pues no mester di un bus pa moviliza nan mes.
Nos ta bishita bo na un forma sutil, cu bo bisiña no mester haya sa ken a bin bishita bo”, señora Hart a splica.
Hart a expresa palabranan di danki na Docter Hendrikus Van Gaalen, cu tabata e director medico di Respaldo, ken ta na Sint Maarten awo. “Pero sigur nos tin hopi contacto estrecho cu ne, y mi kier yama hopi, hopi danki na tur trahado, psikiatra, stakeholder, cu desde dia 1 tabata envolvi cu Respaldo pa support nos. Y no na ultimo lugar, tambe na gobierno di Aruba, Salubridad y e Organo Ehecutivo AZV cu semper ta zorg pa Respaldo tin e fondonan necesario pa opera”, señora Hart a señala.
