*Un trayecto pa hoben cu comete delito leve
ORANJESTAD (AAN) – Seraida Pemberton-Leonard, directora di Reclassering, a reitera cu nan tin un asina yama Halt Traject cu eigenlijk, no ta un proyecto mas y su nomber oficial ta Halt Aruba.
“Nos a bin cu ne na 2023 den cual nos a draai un pilot pa un aña, y aña pasa 2024, nos a lanza e proyecto aki pa publico en general conoce e halt.
E Halt ta un trayecto pa hobennan entre 12 te cu 17 aña, den cual ora nan comete un delito relativamente leve, nan por bin na remarca pa haci un Halt Traject. Eigenlijk, na momento cu e hoben comete e delito ey, e ta un fout, un prome biaha, su caso ta wordo procesa na Jeugd en Zedenpolitie, manda na Reclassering, pa e hoben sigui e Halt Traject pa 4 luna, y na momento cu e rond af positivamente, e ora ey su caso ta cera, e no ta yega Ministerio Publico”, señora Pemberton a señala.
E dama a subraya cu esaki ta e meta mas grandi cu Reclassering tin, pa evita cu e hoben drenta den e circuito hudicial.
“Experiencia ta cu ora e hobennan cuminza cu delitonan leve y no tin intervencion, nan por sigui y sigui, te ora e comete delitonan mas pisa, cu consecuencianan mas pisa pa nan, p’esey nos a bin cu e halt”, señora Pemberton-Leonard a señala.
Señora Pemberton a indica cu Reclassering a bin cu e Halt Traject netamente pa evita cu e hoben cu ta comete delito leve, no drenta den e sistema hudicial, pero nan ta riparando mas y mas, cu hobennan tin hopi problema social. “Nos ta yam’e multi problems gevallen”, el a expresa.
“Eynan ta unda nos ta concern over di esey, pasobra bo por evita pa e bay den e sistema hudicial, pero tin otro problemanan cu mester takel”, Señora Pemberton a comenta.
El a splica cu siman pasa nan a haci un encuentro tocante Halt unda a trece tur e departamentonan hunto pa nan por conoce mas den detaye kico Reclassering a haci durante aña pa cu halt, y tambe pa wak con nan ta takel e multi problemanan.
El a agrega cu e halt no ta obligatorio, den sentido cu no por obliga un hoben drenta of acepta e halt. Pero na momento cu un hoben scoge pa drenta e Halt Traject e tin cu cab’e completamente, y si no ta hacie su caso ta bay bek na Jeugd en Zedenpolitie, y e ora ey nan ta proces’e y mand’e pa Ministerio Publico, y e hoben ta bay haya un trayecto hudicial, cu ta locual Reclassering kier evita. E parti hudicial ta ancra y Reclassering kier sigui cu ne.
