ORANJESTAD (AAN) –Despues cu Minister Demisionario Ursell Arends a haci un introduccion, den conferencia di prensa,
tocante un rapport traha pa AAG Financial Services, relaciona cu e costo di cuido di Adulto Mayor, e directora di Directie Ouderenzaken, señora Desiree Helder, a mustra e proyeccion haci pa 2025-2040.
Señora Helder a reitera cu e rapport aki ta referi na e costo di cuido di adultonan mayor na unda, no solamente a wak e costonan actual di 2025, sino cu tambe a haci proyeccionnan pa aña 2040.
“Naturalmente ta 15 aña, pero 15 aña ta mañan e ta. Pues pa nos prepara pa 2040, pa nos ta berdad, ta up to date. E punto di salida, eigenlijk, di e investigacion y e rapport aki, ta cu gobierno tin e deber pa percura pa e calidad di cuido di nos adulto mayor, ta optimal. Pero no solamente esey, sino cu e ta pagabel y accesibel pa un y tur. Y pesey nos a haci e investigacion aki hunto cu AAG y cu diferente experto tambe, den cuido di adulto mayor, tambe teniendo cuenta cu e vergrijzing. E t’asina cu actualmente un 18.9% di e poblacion di Aruba ta 65 aña of mas; si nos wak en berdad ta casi un di cada cinco persona aki na Aruba, tin 65 aña of mas; y tambe un 13.3% tin por lo menos un limitacion. Limitacion di bista, di movecion, di oido, pero tambe un 10% di nan mester di ayudo di cuido personal of cuido di trabao di cas. Un 5.1% ta den hopi mal estado di salud y 2.4% berdad ta bibando den un cas di cuido”, señora Helder a señala.
E dama a agrega cu banda di tur esaki tin un lista di spera na SABA, un 258 persona cu ta wardando pa wordo ingresa den SABA.
“E calculacion aki ta basa su mes riba tres diferente area. Na prome instancia a wak e cantidad di persona cu mester di cuido actualmente, y a wak no solamente e cantidad actual como proyeccion pa 2040, pero ta wak den futuro cercano, cuanto adulto mayor lo tin mester di cuido na Aruba”, señora Helder, a indica.
“Na di dos lugar a wak e necesidad di cuido pasobra no tur hende mester di e mesun frecuencia, y e mesun intensidad di cuido. Kiermen, nan a wak berdad ki tipo di cuido e personanan mester y ki tipo di specialidad nan mester pa duna e persona e cuido aki”, señora Helder a relata.
El a bisa cu na di tres caminda nan a wak tambe e costo di personal cu nan mester tin pa purba di duna e cuido adecua, tambe a wak e costo di vivienda, y tambe e inventario (camanan adecua, pa por lanta e persona for di cama, por ehemplo), pa por yuda e adulto mayor di e miho manera posible. Akinan tambe a haci un proyeccion pa 2040.
