ORANJESTAD (AAN): Siman pasa Minister Maduro cera conoci cu sr. Roald Laperre kende ta e Director General nobo di Relacion Interno y di Reino (DGKR).
Sr Laperre ta na cabes di e departamento cu ta coordina e relacion entre Aruba, e otro Paisnan den Caribe Hulandes y Hulanda.
Durante e reunion a trata diferente punto cu tin di haber cu e situacion financiero di Aruba. Minister Maduro a haci un apelacion na e DGKR pa tene cuenta cu Aruba su interesnan pa por yega na e trankilidad necesario den Reino pa nos por traha na bienestar di Aruba.
E 'aanwijzing' y Aruba su 'zienswijze': Durante e reunion a combersa riba e decision reciente di Conseho di Ministronan di Reino (RMR) pa no duna Aruba un 'aanwijzing' manera conseha pa CAft. Conforme ley, Aruba a manda su opinion den e 'zienswijze' pa RMR, pero den nan decision RMR no a referi na e puntonan huridico y financiero den e 'zienswijze' cu ta contra-aresta e ponencianan di CAft y ta pone luz riba e forma incorecto cu trata cu e responsabilidad constitucional den Reino Hulandes.
E madatario a haci un apelacion na sr. Laperre pa tene cuenta cu Aruba su 'zienswijze,' ya cu esaki ta conta tambe pa e discucion nos dilanti riba presupuesto pa aña 2023.
Condicion di pago di debe na Hulanda: Minister Maduro a pidi atencion special pa e dialogo riba e condicionnan pa paga Hulanda back e fianza cu a worde haci pa Aruba por sobrepasa e pandemia di COVID-19. Contrario na otro Paisnan den Reino, Aruba tin creditornan riba mercado internacional y pesey ta importante pa nos por tin un bista riba e efecto cu e debe crea cu Hulanda lo tin pa e capacidad di pago di Aruba.
Te ainda e dialogo aki no a tuma luga, y Aruba mester por duna su creditornan claridad pa aña 2023 bay dilanti.
Evalua e supervision financiero di CAft: Un otro punto necesario pa trece trankilidad ta pa e supervision financiero di CAft worde evalua. Desde aña 2015 cu e ley di LAft cu ta rigi e supervision financiero a drenta na vigor, nunca esaki a worde evalua.
Sigur awor cu Hulanda ta exigi pa e supervision financiero worde hinca den un Rijkswet RAFT, ta hopi importante pa haci un evaluacion envez di djies sigui cu un supervision no optimal via un bachi huridico diferente.
Mester trankilidad pa asina por traha na bienestar di Aruba: Minister Maduro a enfatisa cu sigur despues di un pandemia manera esun di COVID-19, e ta importante pa na Aruba y den Reino por tin trankilidad. Esaki ta necesario pa por enfrenta e retonan nos dilanti y pa por tin e espacio necesario pa por traha na bienestar di Aruba.
E lunanan tras di lomba tabata tin basta intrankilidad debi na e menaza di 'aanwijzing' siendo cu tur esaki por a worde evita si tabata tin mas comprension y respet pa otro den Reino Hulandes. Dialogo en persona ta yuda crea claridad y trankilidad, y pesey na final di e reunion Minister Maduro a desea sr. Laperre hopi exito cu e reto nobo como DGKR y e mandatario a gradici'e di adelanta pa tur esfuerso cu lo worde haci na bienestar di Aruba.
