Pa Dialuna 11 di mei, atardi 6’or:
ORANJESTAD (AAN)-- Durante su entrevista cu Matutino DIARIO, señor Carlos Martinus, director di OABA (Openbaar Avond Beroepsonderwijs Aruba), a extende un invitacion na pueblo en general, pa dialuna 11 di mei, pa 6’or di atardi, ta presente na un anochi di informacion na edificio di EPB-HATO.
“Nos ta bay tey pa duna informacion y intercambia datonan cu otro, unda nos ta bay haci e posibilidadnan pa combersacionnan individual cu tur hende. Pero bo tin cu yega, bisa ken bo ta, laga bo number di telefon atras, y nos tey pa yuda. Nos ta busca semper personaliza programa pa cada hende. Bin cu smaak y cu mente habri pa traha riba bo futuro; esey nos ta brinda. Nos kier traha riba e futuro di nos alumnonan”, Director Martinus a reitera.
El a expresa cu scol tin basta espacio, pero si mester crea mas espacio nan lo hacie. “Nos no tin stop, nos ta busca modonan semper y financieramente, unda cu ta pa nos por yuda tur hende. E meta ta pa yuda tur hende cu bin akinan”, el a enfatiza.
Señor Martinus a expresa cu scol tin un team cu nan satisfaccion pa traha anochi t’asina grandi cu e propaganda boca pa boca di e docentenan ta bin cerca otronan.
“Mi ta honesto, mi no tin miedo di kita alumno di otro scol. Ami ta bisa semper si bo ta bezig na 4de klas di Scol MAVO, cab’e. Pasobra bo ta cuminza full di nobo cerca mi, bo tin cu cuminza cu algo nobo”, señor Martinus a señala.
Señor Martinus a bisa cu tur hende cu kier siña un tecnologia, cu kier bay un techniek, bin na OABA.
