Jacco Vroegop a lansa e ponencia mas ridiculo den historia medico --- *Jacco ta experto di Covid of di drecha wowo pa no bisti bril? --- *Si Jacco a keda den VVD awe Rutte lo a bula for di Afsluitdijk??
ORANJESTAD(AAN)—Aparentemente ni e huma di clapchi a yuda Aruba pa deshaci di e pushi preto, cu mester ta sconde den vecindario di hospital.
Ta increibel cuanto drama y comedia e hospital a produci for di momento cu a dicidi di bay gasta placa di Pueblo pa crea un desaster cu mester a haya solucion.
Holor di Diesel a menasa trahador y pashent. Yobida den e edificio. Dak di asbest na candela. Desconoci a bula fuse di e sistema di registro di pashentnan.
Pandemia a bati na porta. Drama humano Aruba a conoce como parti di un mundo, cu ta lucha pa recobra su salud cu Covid-19 ta pone na peliger.
Ora Jacco a haci su entrada, Aruba a keda contento cu e Raad van Bestuur a haya un Presidente. Aruba a lubida e Raad di Pushi Preto te na momento cu Jacco a dicidi pa rementa un pagara.
Kende por kere cu un director di un hospital ta bin cuestiona e hecho cu Aruba ta laga haci test di Covid-19 y ta vacuna su poblacion contra morto?
Loke a pasa na Aruba na final di 2021, no tin nomber. Na cualkier pais, Jacco lo a haya su retiro imediato.
Con un Director di Hospital por bay contra e maneho di Gobierno cu ta basa riba pasonan cu expertonan mundial y organisacionnan mundial ta tuma pa hende por bandona e pandemia?
Cu ki clase di hende Jacco a kere e ta atende, ora el a bin kibra e trabou duro di Gobierno y tur trahador incansabel di cuido medico cu a evita cu e olanan di e Coronavirus nobo lo a exigi bida di Miles y Miles na Aruba?
Jacco como Director di Hospital no ta na haltura cu Aruba a vence e prome olanan di variantenan sumamente mortal manera Delta dor di medidanan cu Gobierno hunto cu tur experto di tur color politico y trahadornan incansabel a tuma.
Kico Jacco ta pretende cu inmunidad natural, cu mester wordo conecto directamente na morto di e personanan mas fragil?
Ora Covid-19 a bati na porta di Aruba, Gobierno di Aruba y di henter mundo tabata tin dos opcion manera Jacco mester sa.
Ta tuma medida pa scapa bida of ta laga tur hende haya e malesa y esun cu sobrevivi ta sobrevivi. E persona cu muri, ta muri.
Esaki ta loke segun Jacco mester a pasa pa asina tin placa pa paga gastonan di hospital, cu mester cubri su salario tambe?
Aruba debe Jacco placa? Acaso Aruba a gasta placa cu e debe Jacco pa test personanan cu a wordo contagia cu e virus y evita cu e ta sigui plama?
Acaso Aruba a gasta placa cu e por a uza pa un oficina mas grandi pa Jacco, na vacuna pa logra cu Aruba no a conoce mas victima di Delta, cu ainda ta presente na Aruba?
Loke a pasa na Aruba no tin nomber. Expertonan medico ta guia Aruba den asunto di Covid-19.
Jacco ta un experto di Covid-19 of Jacco ta un experto den drecha wowo pa no bisti bril?
Pa Aruba atende cu Covid-19 e mester di expertonan riba tereno di pandemia, di pulmon y tur loke Covid-19 ta ocasiona.
Na Africa del Sur ta atribui e logro pa combati Omicron (manera Aruba a supera Delta) tambe na e vacuna.
Loke Jacco como Director di Hospital a haci, no tin nomber! El a uza su funcion pa kibra esfuersonan y sacrificio di tanto hende pa scapa Aruba di otro ola di Covid-19.
No mester di Jacco pa corda Aruba cu tur hende a nace pa muri. Ta pa lucha contra morto Aruba a paga Jacco, cu mester disculpa su mes.
Jacco kier bolbe mundo politico? Jacco kier habri un ala di VVD na Aruba? Pregunta y mas pregunta cu Pueblo di Aruba, cu ta paga Jacco, ta haci su mes.
Sigur ta keda atras e pregunta, si Rutte lo a bula for di Afsluitdijk den desesperacion si Jacco a keda den politica na Hulanda.
Mientrastanto Aruba a keda cu un pushi preto cu ta rondea inmunidad den vecindario di hospital.
