E ta convenci cu vacuna no ta preveni Omicron
ORANJESTAD (AAN): Na opinion di Director di Hospital di Aruba, esta Jacco Vroegop, e momento a yega pa sigui promove un estilo di bida saludable y pensa aun mas profundo si e idea di obliga tur hende pa tuma e vacuna contra Covid-19 ta corecto of no.
Vroegop a bisa esaki den un entrevista cu e vespertino Amigoe, caminda a sali for di e punto di bista cu e prome 17 personanan na Aruba cu a resulta di a wordo contagia cu e variante Omicron, tabata hendenan vacuna.
E corant a conclui cu esaki ta indica cu e vacuna contra Covid-19 no ta preveni e infeccion ni contagio di e virus.
Y esey ta motibonan legitimo pa sigui actua contra un obligacion general pa hende vacuna, y mihor promove un estilo di bida saludable.
Mientras tanto Aruba ta awor mey-mey di e di cinco ola cu mas di 2.700 caso activo. Te cu siman pasa, como 67% di esnan cu a sali positivo ta contagia cu e variante di Omicron.
Na Hospital e situacion ainda ta bao control, cu 0 persona den unidad di Intensive Care.
Segun Director Vroegop, mientras tanto tin consensus mas amplio cu diferente vacuna contra Covid-19 ta ofrece menos bon proteccion contra contagio compara cu e pensamento di algun tempo pasa. Y contra Omicron, e vacuna ta hasta traha 4 te 5 biaha menos bon, segun dato cu Vroegop a usa di Director van Dissel di RIVM.
El a bisa cu e boostershot ta yuda solamente cu 25 te cu 30 porciento. Pesey mes ta logico pa pensa cu tur hende atrobe ta vulnerable pa e variante actual di Covid-19. Kizas esnan vacuna mes, como cu nan sistema inmunologico ta parce di ta menos robusto, compara cu hendenan cu di un forma natural a produci inmunidad.
Pesey Jacco Vroegop a indica, cu e mes como director di e unico Hospital na Aruba, ta keda di ta contra un obligacion di vacuna. El a bisa cu tur hende sa con critico e ta riba esey for di comienzo, y no obstante hopi presion interno, e no kier haci distincion entre coleganan y pashentnan cu kier haya of no e vacuna.
Segun Vroegop, awor cu Coronavirus lo bay keda aki pa mas tempo, cu e olanan cu ta bin y bay, y ta parce di ta sigui e patronchi di temporada di griep, esaki lo tin presion riba cuido tambe. Pa esaki e cuido di salud por busca forma pa inverti mas den hende, materia, y materialnan. Tambe puntra si acaso e test continuo riba Covid-19 ta bay keda sostenible asina.
Toch aki tin di reconoce, cu aunke con dificil e ta, corda cu tin un comienzo y fin na un bida. E Director ta pensa riba e caminda pa haya inmunidad natural envez di gruponnan sin limite, cu no por of mag di bira malo, y keda vacuna nan. Principalmente si pa esaki ta keda causa estorbo na sociedadnan, cu tur daño economico y mental di esey.
Naturalmente ta trata aki di un balance entre cuido y sociedad, y no djis laga uno bay di un banda pa e otro. Hospital di Aruba semper lo sigui lucha pa cada pashent. Pa esaki e ta pidi pa sigui promove un estilo di bida mas saludable, como e motor tras di un mihor bida unda tin mester di menos cuido medico.
