Segun Gilbert Maduro, Presidente di SADA:
- Aduana a tene un accion di protesta
- Nan ta hopi preocupante
ORANJESTAD (AAN): Diaranson atardi a tuma luga un accion di trahadonan di Douane K9 pa demostra nan mal contento pa loke ta trata nan siguridad personal. Presidente di SADA, señor Gilbert Maduro a splica DIARIO cu tin un situacionnan preocupante cu ta andando den e departamento. El a menciona cu esaki a cuminsa dos aña atras caba bou di e maneho di e ex minister Xiomara Maduro na unda cu e Director a tuma decisionnan cu no a y ainda no ta conta cu aprobacion di e departamento aki, cu ta indica cu nan siguridad personal no ta wordo balora den e decision aki.
Segun e, aworaki e miembronan ta hopi disgusta pasobra nan ta sinti cu nan siguridad personal ta na peliger. Señor Maduro a remarca cu e tempo ey caba, e trahadonan a indica cu si e decision di e director keda vigente, nan lo entrega tur material cu nan tin pa haci nan trabao di K9 incluyendo e K9’nan mes.
Segun señor Maduro, e tempo ey, e ex minister door di a wordo mal informa, a tuma parti pa e director. Sinembargo, den un reunion cu e ex minister despues di algun luna, e directiva a presenta tur documentacion pa prueba cu e director a mal informa e ex minister.
E tempo ey, ex minister a admiti di a wordo mal informa, den otro palabra, e director a gaña e ex minister, y a tuma e decision. Lamentablemente, señor Maduro a enfatisa, e ex minister no a tuma niun paso contra e director, niun acto disciplinario contra e director y tampoco no a haci intento pa un paz laboral bou di e miembronan di e departamento aki.
Despues di dos aña, e problema no a keda soluciona y trahadonan a manda un email pa e director kende di su banda a duna un contesta cu no a cay na satisfaccion di e trahadonan. Basa riba esaki, nan a yama sindicato Sada cu a consaha nan kico ta e siguiente pasonan pa tuma den e situacion aki y e opcionnan cu tin.
Señor Maduro a remarca cu e gobierno actual ta na haltura di e situacion aki, ya desde e tempo di formacion di e gabinete. Pero lamentablemente, el a expresa, despues di un aña cu e minister actual ta na mando, tampoco a tuma decision ainda pa pone cu e director mester regla e asunto aki cu, segun e, e ta algo cu por wordo geregeld.
Segun señor Maduro, Departamento di Recurso Humano tambe ta na haltura di e situacion aki na unda cu e Director, señora Omaira Lares a indica cu nan ta cla pa yuda soluciona e problema. “Door cu e director di Douane ta den un posicion cu ta e ta manda y dicidi y cu no tin hende cu no por bis’e nada, e problema aki no a wordo soluciona ainda. Pero nos ta kere si cu e por wordo soluciona hopi lihe”, señor Maduro a enfatisa.
Na final, señor Maduro a remarca cu si decision pa solucion no wordo tuma, pais Aruba por wordo percudica. Comercio tambe por wordo perhudica pa motibo cu apesar cu K9 no ta un departamento grandi, e ta sumamente vital pa e siguridad y control di Aruba.
