SADA kier haya oido di gobieno y nan Leiding:
ORANJESTAD (AAN) – Edward Maduro, presidente di Sindicato di Aduana (SADA), den conferencia di prensa a toca, como di dos punto di agenda, e tema di e VUT Regeling cu gobierno a bolbe introduci.
El a referi na aña pasa cu tambe tabata tin e opcion aki pa retiro boluntario di ambtenaar, algun empleado di Aduana a pidi pa bay cu VUT pero nan a wordo nenga.
SADA ta puntra di con gobierno ta bin cu VUT pa purba baha gasto, anto tur ta wordo nenga, no pa motibonan valido, SADA ta puntra ki bal bin cu VUT si e ta wordo nenga? Atrobe nan a bin cu VUT pero ta bin cu e mesun practica unda ta nenga cu argumentonan fofo y sin base. Nos ta puntra e ora ey, kico ta e motibo of e argumento valido pa bin cu VUT siendo cu gobierno ta bin cune pa baha gasto. El a bisa cu tristo ta cu tin otro trahadornan di Aduana cu no a pidi pa baha cu VUT, pero e director ta pidi esnan cu tin un of otro condicion medico, pa bay cu VUT. “Nos no ta compronde e maneho di e director aki. E ta malusando e secrecia medico, ya cu como director bo sa cu un trahador ta sufri di cierto malesa, anto e ta purba intimida y forza e trahador aki pa bay cu VUT, siendo cu e no a pidi esaki. Akinan por wak cu nos tin cu acerca gobierno un biaha mas, y e leiding di Aduana tambe, pa wak kico ta bayendo robes, pasobra gobierno kier baha gasto pero ta comosifuera cu e director di Cuerpo di Aduana no kier pa gobierno baha su gastonan.
Maduro a menciona cu tin trahadornan di Aduana cu kier haya un permiso sin salario, pa nan sigui un estudio pero nan ta wordo nenga, y SADA a tuma nota cu otro ambtenaarnan cu ta haya atencion extraordinario, cu por funciona of traha den 'buiteland" cu salario y e ta puntra cu cuanto medida ta wordo midi, pasobra e homber chikito cu kier caba su estudio ta pidi un permiso sin salario, cu ta regla den ley cu e ta posible, ta wordo nenga, anto otro ambtenaar por bay biba den exterior y traha for otro pais, y ta sigui cobra. Esaki sigur no ta corecto segun Presidente di SADA y no ta husto pa su coleganan cu kier haci uso di locual ley ta prescribi. “Nos ta spera cu nos haya oido di gobierno y di Parlamento y di nos leiding pa nos ta sigur cu por soluciona e problema”, el a señala.
Pa finaliza el a expresa cu esaki no ta solamente pa esnan di Aduana sino pa tur ambtenaar cu ta pasando en mesun situacion, y cu ta representa pa un sindicato y tambe kier haya oido.
