Señora Desiree Helder:
ORANJESTAD (AAN): Directie Ouderenzaken ta den combersacionnan cu EPI pa formalisa e funcion di cuidador y crea un sistema pa identifica, evalua y certifica personanan cu ta ofrece cuido na adulto mayor y otro personanan cu tin necesidad di asistencia.
Directora di Directie Ouderenzaken, señora Desiree Helder, a splica cu como parti di e proceso, ta necesario pa describi claramente e funcion di un cuidador y determina cua conocemento y competencia e persona mester tin pa por eherce e trabao.
Despues di establece e criterianan, por desaroya un examen di competencia cu EPI. Esaki lo permiti evalua e nivel di cada cuidador y certific’e conforme nan capacidadnan.
Despues ta sigui e proceso di registracion. Cu un carnet di registracion, e persona cu ta ricibi cuido y su famia por tin mas siguridad y confianza den e trabao cu un dunador di cuido ta haci.
Segun Helder, e sistema proyecta no solamente lo yuda pa identifica y registra cuidadornan debidamente, si no lo crea mas claridad tocante e nivel di cuido cu cada persona ta cualifica pa ofrece.
Helder a aclara cu e proceso lo tuma tempo y lo cana formalmente, pasobra ta importante pa describi e funcion y competencianan corectamente, prepara e evaluacion y establece un registracion confiabel. Pa esaki lo establece un werkgroup pa setup e sistema bon.
Banda di e certificacion, Directie Ouderenzaken y EPI ta explora e posibilidad di ofrece cursonan cortico pa personanan cu actualmente ta duna cuido den cas di cuido, hogar pa adulto mayor of na cas di e propio cliente.
E cursonan por wordo ofreci, por ehempel, un biaha pa siman den oranan di anochi, pa asina personanan cu ta traha durante dia tambe tin oportunidad di participa. E meta ta pa nan por certifica nan mes y prepara pa ofrece cuido mas intensivo.
E programa no lo ta destina solamente pa personanan cu ainda no tin certificacion. Cuidadornan cu ya ta cualifica tambe lo por sigui entrenamento adicional pa actualisa nan conocemento.
Segun Helder, e sector di cuido ta sigui cambia y constantemente tin metodonan nobo. P’esey, ta importante pa profesionalnan mantene nan conocemento y habilidadnan actualisa.
Mientras e sistema ta den fase di preparacion, Directie Ouderenzaken ta sigui recomenda famianan pa verifica cuidadosamente e diploma, experiencia y referencianan di cualkier persona cu nan ta considera pa brinda cuido na cas.
