Directie Ouderenzaken tambe lo participa na e Simposio di Mantelzorg 2026

Directie Ouderenzaken tambe lo participa na e Simposio di Mantelzorg 2026

Damara Rasmijn:

ORANJESTAD (AAN) – Directie Ouderenzaken lo participa na e prome edicion di Symposium Mantelzorg 2026, organiza pa Stichting Mantelzorg Aruba. E simposio tin como tema “Reconocemento, sosten y conexion pa nos mantelzorgers”.

   Den un entrevista cu DIARIO, Damara Rasmijn, PR di Directie Ouderenzaken, a indica cu e simposio ta un oportunidad pa conoce miho e situacion di e personanan cu ta brinda cuido, specialmente na adultonan mayor, sin ricibi pago. Ainda falta informacion tocante cuanto mantelzorger tin na Aruba, ken nan ta y ki tipo di sosten nan mester.

   Segun cifranan di Censo 2020 di CBS, 9% di adultonan mayor ta ricibi cuido di un otro adulto mayor. Ta espera cu e grupo aki lo sigui crece. Rasmijn a señala cu un mantelzorger di 65 aña of mas por yega na un momento na unda e mes tambe lo tin mester di cuido.

   Directie Ouderenzaken ta prefera cu adultonan mayor por keda biba na nan mes cas mas largo posibel. Segun Rasmijn, e sosten di un mantelzorger ta haci esaki posibel pa hopi di nan. Hopi biaha ta un familiar cu ta biba den e mesun cas ta percura pa e cuido diario.

  Rasmijn a indica cu ta conoci cu mayoria di mantelzorgernan ta hende muhe y cu ainda falta informacion tocante nan necesidadnan. Directie Ouderenzaken ta spera cu e intercambio durante e simposio lo yuda identifica ki tipo di sosten lo yuda nan den practica.

   Cu un miho bista riba e necesidadnan, Directie Ouderenzaken por evalua con e por brinda sosten. Un posibilidad ta ofrece training y tayernan practico pa yuda mantelzorgernan cu e tareanan diario di cuido di un adulto.