Meverly Romano ta splica:
*E cantidad ta asina hopi cu lo tuma tempo pa parti tur
ORANJESTAD (AAN)—Meverly Romano, Relacionista Publico di Departamento di Impuesto (DIMP), den entrevista cu DIARIO a mustra cu DIMP ta sacando e cahanan di plach'i number caba, e rekinan ta cla caba.
“Nos ta sacando tur e plachinan fo'i caha. Mi tin cu bisa cu nos tin mas cu mil caha akiden. E ta un trabao inmenso. Nos ta calcula cu e lo tuma dos siman pa saca tur cos, pon’e den orden riba reki, pero kizas e ta tuma un tiki mas di tempo. Pues, nos no ta cla pa anuncia ainda ki dia nos ta bay start, pero e lo ta pronto. Pa esunnan cu a paga caba, keda pendiente! Asina nos habri e link pa haci afspraak nos lo bay publica e linknan caminda e clientenan por cuminza haci nan cita pa nan por bin busca nan plachi. Cada persona mag busca te 5 plachi”, Meverly Romano a duna di conoce.
Pa Departamento di Impuesto por ta pa December caba, pero pa Polis ainda no; pasobra e plachi ta valido di 2025 padilanti y e ta conta te 2029.
“Dus, si nos kier habrie mes entrante December, nos lo mester haya aprobacion tambe di KPA, pues un bez cu bo parti e plachinan ey, e automobilista no ta bay keda sin pon’e riba su auto.
“E ora ey nos no kier tampoco pa polis hay’e riba caya anto cuminza dun’e un boet, no ta un plachi di 2024 sino di 2025. Esey ta formalidadnan cu nos lo mester averigua prome con e ta bay, pero si no, nos ta cuminza e prome siman di Januari caba, ora nan cuminza haci nan cita pa haya nan afspraak”, señora Romano a comenta.
Algo cu DIMAS kier bisa di awe caba, señora Romano a trece dilanti, ta cu nan no por bay parti 92.000 plachi den un luna. “Esey no ta bay den un siman, ni den un luna. Esey ta bay tuma mas tempo, kiermen bo por haya cu na februari ainda tin persona cu no a ricibi nan plachi. Esey ta algo cu nan mester tene na cuenta”, Romano a subraya.
E reparticion di plachi ta bay ta na DIMP so, den su edificio anexo. El a señala cu den dos luna DIMP a registra 1072 vehiculo di motor cu a bin nobo y por mira cu e cantidad di autonan cu ta aumentando dia pa dia riba nos careteranan ta hopi.
