*Tur cu ta core auto cu plachi cu no ta blauw cu blanco ta actuando ilegalmente
ORANJESTAD (AAN)-- Señora Meverly Romano, Relacionista Publico di Departamento di Impuesto “DIMP”, den entrevista cu Matutino DIARIO, tocante pagamento di impuesto riba number di auto, a sigui splica cu e personanan cu ta core auto riba caminda usando un plachi cu no ta blauw cu blanco, cu DIMP a otorga, ta actuando ilegal.
“Si acaso nan ta subi caminda cu algo traha di carton, of un sticker, of nos a mira cu hasta tin cu ta falsifica e number cu plachi di metal, nos ta reconoce mesora cu ta un number falso. Tur esakinan ta ilegal y e supervision y control ta den man di Cuerpo di Polis”, Meverly Romano a acentua.
Señora Romano a bolbe referi na cifranan, pero di aña 2025, cu cual DIMP a habri aña 2026.
“Nos por mira cu 90% di e belasting di aña 2025, a cumpli. Nos a premira esaki tambe pasobra tabata tin cambio di plachi di number. Nuebe porciento no a cumpli; di e 9% aki, 4% a paga solamente impuesto di mitad di aña y 5% no a paga nada mes di 2025. E 5% aki ta un total di 5.299 number cu nos no tin pago registra riba nan. “Esey ta nifica cu e casi 5.300 number, no a ricibi nan plachi tampoco. Nos tin nan warda, wardando e pago drenta y te Januari e no a drenta. Mi ta duda cu e por a drenta aworaki, pasobra mas sigur ta cu ta personanan cu lo tin debenan atrasa”, Meverly Romano a señala.
El a reitera cu nan no ta wordo permiti pa paga 2025 tanten cu nan no clear e debe bieu. “Y esaki ta un cantidad di 5.299, anto di e cantidad aki 4.527 ta categoria A. Esaki ta e categoria di mas grandi cu nos tin. Y otro cos, na Januari nos a habri aña cu 97.710 number registra. Aworaki nos ta na Februari y nos tin registra 98.007 number, Kiermen, bo por wak cu den algun siman, nos a yega 98 mil, anto un 300 number cu a bin extra, no kiermen cu nos tin 300 registracion nobo, nos tin hopi mas cu esey, pasobra tin hendenan cu tin añanan sin paga, y na dado momento nos ta bay kita e number for di nan. Of tin hendenan cu ta abandonando Aruba, of pa cualkier motibo no ta bay uza e number mas, nan ta bin entrega e plachi, y nan ta bisa cu nan no ta bay use mas, anto nos ta recicla esaki, dun’e otra persona”, señora Romano a splica.
El a sigui comenta cu desde September te December 2025, DIMP a wak cu e cantidad di registronan nobo a aumenta asina hopi y lihe; na Januari nan a bestel tres mil plachi extra, y esey a caba. “Nos a cuminza aña y nos a bestel casi siete mil plachi extra, y esey ta e cantidad di demanda pa number nobo, cu tabata asina halto cu el a surpasa e proceso administrativo cu nos tin pa besteling di plachi y esey a causa cu na dado momento nos no tabata tin number, pa nos por a continua cu registracion di vehiculo”, señora Meverly Romano a relata.
