Relacionista Publico Meverly Romano:
ORANJESTAD (AAN) – Ademas cu Departamento di Impuesto a implementa un sistema di cita y di parti e plachinan, nan a introduci un encuesta unda nan a pidi e feed back di e automobistanan, puntrando nan con nan a haya e servicio cu DIMP a duna nan.
Señora Meverly Romano, Relacionista Publico di DIMP, den conferencia di prensa reciente a menciona, den e encuesta aki nan a registra 5709 persona cu nan a yuda cu a bin na e cita y busca nan plachi. Di e 5709 clientenan aki 5.635 a duna DIMP un score. Nan por a score e servicio malo, hopi malo, bon of hopi bon.
E resultado ta cu 242 persona a score DIMP hopi malo, 327 a score nan malo, pero 1.707 a score nan bon y 3377 a score nan hopi bon.
“Kiermen, nos ta sumamente satisfecho pa e score aki, pasobra den dunamento di servicio unda bo ta atende clientenan masalmente, nos ta papiando di basta mil cliente, semper por tin algo kizas cu a bay menos bon, kizas cu e persona no a spera, kizas cu nos tampoco no a spera. Pero nos a percura si, pa nos por a atende nos clientenan na un manera mas lihe, mas eficiente, mas profesional, asina cu tur automobilista por a haya nan plachi. Di e cifranan di e encuesta mi tin cu bisa cu e encuesta aki a wordo haci completamente anonimo, nos no sa di ken e ta”, señora Romano a señala.
Poniendo e cifranan hunto, 569 persona a score DIMP malo/hopi malo, pero 5.084 persona a score nos bon y hopi bon. “Esey ta nifica den porcentahe cu 10% nan experiencia no tabata asina bon, of nan no tabata mucho satisfecho cu nos servicio pero 90% si a score nos bon y hopi bon, y nos a haya esaki hopi bon”, Meverly Romano, a expresa.
