ORANJESTAD (AAN): Un tema cu tur contribuyente mester tene cuenta cu ne ta e Inkomstenbelasting.
Tin contribuyentenan cu ta pendiente pa haya e restituacionnan cu Departamento di Impuesto ta paga di 2022.
Director di Departamento di Impuesto, Luenne Gomez-Pieters a duna un 'update' di e proceso y a indica cu ya caba tin e prome kwartaal di 2024 tras di lomba.
Ya caba DIMP a paga un total di 26.6 miyon Florin na 2023 na restitucion di impuesto (Inkomstenbelasting) . Te cu prome kwartaal di 2024, DIMP a procesa y paga 4.6 miyon Florin na restitucion. A otorga pa loke ta Inkomstenbelasting na 2023, 43.028 formulario. A haya 27.828 formulario bek, cu ta mitad di loke DIMP a saca, Gomez-Pieters a splica.
Esaki ta un 'red flag' pa loke ta 'compliance'. Di esakinan a procesa 19.176 formulario caba y a paga e restitucion. Falta 8.652 formulario di 2022 pa wordo procesa. Lo keda cla cu esaki tambe prome cu e siguiente formulario sali. Tur contribuyente lo haya e restitucion cu ta nan derecho, e directora di DIMP a duna di conoce.
