Kathy Paskel, director DIMAS:
ORANJESTAD (AAN)-- Señora Kathy Paskel, Director di DIMAS, a duna di conoce den entrevista cu DIARIO, cu e prome permiso di trabao na e momentonan aki ta wordo nenga, y solamente e lista di excepcion cu a wordo publica ta ser duna.
“Nos ta wak cu personanan ta sigui aplica pa cierto posicionnan cu no ta riba e lista, y eseynan ta wordo nenga. Pero nos ta wak tambe cu tin companianan ta aplicando pa personanan cu si ta cay bao e lista di excepcion, pero na momento cu nos trata esaki nos ta wak cu e persona ta na Aruba. Pues, el a bin como turista y no a sali. Eseynan tambe ta wordo nenga”, Kathy Paskel a declara.
El a agrega cu importante ta cu si un empresa wak cu e tin necesidad y e tin intencion riba e lista di excepcion, p’e haci aplicacion mientras cu e persona aki ta den exterior, y e persona ta drenta e ora ey cu su carta di invitacion, p’e bin haci su testnan medico aki na Aruba.
“Nos ta wak cu eynan tin un parti cu hopi negacion, pasobra kizas tin speranza cu e ta na Aruba, pero e ta riba lista di excepcion, anto e lo haya e permiso. No! Bo mester ta den exterior” Kathy Paskel a reitera.
Otro aspectonan, Paskel a menciona, ta cu tin personanan ta entregando nan documentonan incompleto. “Nos ta purga reachnan prome cu nenga, pero si no ta duna contestacion riba e documentonan cu falta, finalmente nos ta haci negacion di esey”, señora Kathy Paskel a indica.
