Marilyn Wout, PR ta informa:
ORANJESTAD (AAN) – Marilyn Wout, Relacionista Publico di DIMAS (Departamento di Integracion y Maneho di Stranheria), a informa tocante diferente proceso cu ta andando pa loke ta integracion y maneho di stranhero.
Siman pasa DIMAS a ricibi e ultimo version di e buki di maneho, y esaki a wordo inclui den su website; na e momento aki e ta na Hulandes, pero ta den proceso pa wordo traduci na e diferente idiomanan, Wout a indica.
“Nos tin entendi cu tin diferente compania di sector comercial, cu tin e necesidad pa tuma personanan den servicio, cu mester permiso laboral, pasobra nan no ta hayando e forzanan laboral aki riba e mercado local”, Marilyn Wout a duna di conoce.
El a sigui bisa cu e maneho nobo di Minister di Integracion, tambe ta basa riba e necesidad cu e mercado laboral tin, e desaroyonan economico cu ta andando aworaki na Aruba, y a base di esey tambe, e maneho a wordo actualiza.
DIMAS ta avisa e companianan cu tin necesidad pa busca personanan pa atrae e forza laboral, vooral esnan cu ta stranhero, door cu nan no por a haya trahador local, cu si ainda nan no a haya e curso di 'onboarding' (induccion) den e portal di DIMAS, pa por fabor inscribi den e curso aki.
“E siguiente training ta bay cuminza na April. Asina aki nos ta invitando tur e companianan cu tin personanan den servicio cu tin necesidad pa un permiso, sea pa e casa di e persona aki of yiunan menor di edad, por fabor inscribi den e curso aki di onboarding den e portal di DIMAS, pa nan por haya e training. Nan lo haya un update kico e maneho ta encera, kico e documentonan cu mester pa e tipo di permiso cu ta bay aplica p’e, pero tambe nos ta bay siña nan con pa traha cu e portal”, Marilyn Wout a señala.
El a agrega cu e portal tin diferente beneficio, tanto pa e usuario, e persona di DRH (Recurso Humano) cu ta bay introduci e peticion di permiso via e portal, pero tambe e cliente cu ta esun cu ta titular di e permiso aki.
