‘Ennia Curaçao’ ta dolor di cabes pero ‘Ennia Aruba’ ta funciona perfectamente
ORANJESTAD (AAN): Diaranson 27 di maart Prome Minister Evelyn Wever-Croes y un delegacion di Aruba tabata na Curaçao pa atende algun reunion. Un di e topiconan ta e problema cu Ennia ta pasando aden na Curaçao.
Den pasado a yega di menciona caba den DIARIO, cu e problema cu Ennia tin di haber estrictamente cu Curaçao. E problemanan na Curaçao tin nada di haber cu e Ennia cu ta operando na Aruba. Esun na Aruba ta solido y no a confronta ningun problema compara cu loke esun na Curaçao si a pasa aden.
E delegacion di Aruba a consisti di Ministro di Finanzas Xiomara Maduro, president di Banco Central Jane Figaroa-Semeleer, y consehero Nilo Swaen.
Durante e dia aki a reuni cu Prome Minister di Curaçao Gilmar Pic Pisas, Minister di Finansa Javier Silvania y tambe cu ehecutivonan di Banco Central di Curaçao y Sint Maarten (CBCS). Reunionnan pa atende e asunto di Ennia Curaçao a bay bon.
Durante e reunion aki, tambe nan a delibera riba hopi otro tema importante. Un di e temanan aki y di interes mutuo ta esun di refinanciamento di e debe di Covid cu ta un tema importante pa e dos islanan. Akinan Prome Minister a indica cu semper ta importante pa Aruba y Curaçao ta bon alinea y asina un por yuda otro.
“Tabata un dia largo pero hopi productivo y positivo, cu bon reunionnan, na unda nos a logra yega na bon conclusionnan. Manera semper e tabata un placer di por a bishita nos hermana isla Curaçao un biaha mas”, Prome Minister a expresa.
Siman pasa mes, Ennia Aruba a duna su reaccion riba e bishita aki di Aruba na Curaçao. Ennia Aruba un biaha mas ta enfatisa:
“Ennia Aruba ta un compania financieramente sano, cu un posicion financiero solido y un solvencia fuerte. Esaki a yega di wordo confirma recientemente den varios ocasion door di Banco Central di Aruba. E compania Ennia Aruba ta keda subraya cu e interes di nan aseguradonan ta bon protehi y garantisa.”
“Nos kier enfatisa cu Ennia Aruba dentro di Ennia Groep ta funciona como un entidad huridico totalmente autonomo y independiente.”
Nan ta bolbe mustra, cu e recien desaroyonan rond di Ennia Curaçao y e implicacion di gobierno Curasoleño y Banco Central di Curaçao y St. Maarten (CBCS) pa yega na un solucion pa Ennia Curaçao, lo no afecta nada nada e aseguradonan di Ennia Aruba.
Ennia Aruba ta orguyoso cu tanto Banco Central di Aruba y tambe Gobierno local ta sostene nan pa participa mas den e futuro di Ennia Aruba. E bishita di Prome Ministro y Ministro di Finanzas di Aruba na Curaçao ta demostra e compromiso di Gobierno di Aruba den Ennia Aruba.
