DVG cu informacion pa Dia Mundial di Cancer di Tripa
ORANJESTAD (AAN): Riba Dialuna, e Departamento di Salud Publico a desea na comparti cu comunidad informacion balioso pa detecta y preveni e malesa aki.
Algun sintoma di Cancer di Tripa (cancer di colon of colorectal) por varia y tin biaha no tin sintoma mes, specialmente den e prome etapanan. P'esey ta asina importante pa haci screening regular. Sinembargo, ora e sintomanan presenta, nan por inclui:
(*) Cambionan den bo patronchi di bay baño:
- Esaki por inclui diarea persistente of bariga cera.
- Cambionan den e frecuencia of consistencia di af ora di bay baño.
- Sinti cu bo tripa no ta bashi completamente.
- Pidanan di af cu ta mas fini y chikito cu normal.
- Sangramento rectal of sanger den bo af. E sanger aki por ta cora cla of hopi scur.
(*) Molestia abdominal:
- Cram.
- Gas.
- Dolor persistente.
(*) Perdida di peso sin splicacion:
- Debilidad.
- Cansancio.
(*) Anemia:
- Cansancio.
- Falta di color den cuero.
- Falta di rosea.
Ta importante pa corda cu e sintomanan aki tambe por wordo causa pa otro condicionnan menos serio. Sinembargo, si bo experencia cualkier di e sintomanan aki, specialmente si nan persisti, ta crucial pa consulta bo Dokter di Cas.
Loke pa haci pa preveni: Segun DVG, comunidad tin cu haci cambio den nos habitonan, cambia nos estilo di bida y tuma medidanan preventivo pa yuda reduci e riesgo di cancer di colon of colorectal (tripa).
Aki un resumen di strategianan clave:
(*) Screening Regular:
Esaki ta e paso mas importante. Screening por detecta polyps precanceroso, cual por wordo elimina prome cu nan desaroya den cancer. Screening tambe por detecta cancer tempran, ora cu e ta mas tratabel. Papia cu bo dokter pa bo haya sa ki tempo bo mester cuminsa cu screening y kico mester haci. Metodonan comun di screening ta inclui colonoscopia y testnan di af.
(*) Dieta Saludabel:
- Aumenta consumo di fruta y berdura: Esakinan ta provee vitaminanan esencial, mineralnan y fibra.
- Grano integral: Cuminda cu hopi fibra ta promove un digestion saludabel.
- Disminui: Carni cora y procesa.
- Cuminda cu hopi vet: Un dieta abou den vet ta wordo recomenda.
(*) Mantene un Peso Saludabel:
Sobrepeso of obesidad ta aumenta e riesgo di cancer di colon of colorectal (tripa)
Ehercicio regular y un dieta balansa por yuda bo logra y mantene un peso saludabel.
(*) Actividad Fisico Regular:
Ehercicio ta reduci e riesgo di cancer di colon. Pone como meta pa haci minimo 30 minuut di actividad fisico di intensidad modera un biaha pa dia.
(*) Limita Consumo di Alcohol:
Consumo excesivo di alcohol ta aumenta e riesgo pa contrae e cancer aki.
Si bo bebe alcohol, haci esaki cu moderacion.
(*) No Huma:
Humamento ta aumenta e riesgo di diferente tipo di cancer, incluyendo esun aki.
Stop di huma ta un di e miho cosnan cu bo por haci pa bo salud en general.
(*) Otro Consideracionnan:
- Vitamina D y Calcium: Algun estudio ta sugeri cu consumo adecua di e nutrientenan aki por yuda reduci riesgo. Consulta cu bo dokter tocante suplementonan di vitamina y mineral.
(*) Historia Familiar: Si bo tin un historia den famia di cancer di colon of colorectal (tripa), papia cu bo dokter tocante esaki. Kisas bo mester cuminsa cu screening mas tempran of haci screening mas frecuente.
Door di adopta habitonan saludabel y haci screening regular, bo por reduci significativamente bo riesgo di desaroya cancer di colon of colorectal (tripa).
Deteccion y tratamento trempan ta e yabi!
