ORANJESTAD(AAN): Durante ultimo añanan e comerciantenan den Oranjestad a pasa hopi dificil, causa entre otro tambe pa e pandemia di Covid-19.
Mirando esaki Gobierno den transcurso di ultimo lunanan a traha riba diferente proyecto y minister di Asuntonan Economico, Comunicacion y Desaroyo Sostenibel Geoffrey Wever Diahuebs a papia di algun di e proyectonan aki den Oranjestad.
Durante un conferencia di prensa Diahuebs mainta e mandatario a papia di e proyecto di ‘Cas Veneranda’ cu ta un monumento iconico den centro di Oranjestad.
“Pa hopi aña caba e edificio tabata bandona y awor e ta bay bira e edificio nobo di Departamento di Asuntonan Economico”. Arkitecto Orlando Hoevertsz ta trahando riba e diseña cu lo keda cla dentro di algun siman, pa despues por cuminza cu e fase di destaho pa contratistanan por cuminza cu e remodelacion di e edificio importante y iconico aki, segun Wever.
El a papia tambe cu a keda cla cu renovacion y mudamento di Freezone Aruba N.V pa centro di Oranjestad. Segun e minister, hunto cu FCCA a renoba otro edificio cu tabata bandona na final di Plaza Nicki Habibe. E edificio a keda cla y dentro di poco lo wordo inaugura. “Asina nos ta cumpli cu nos compromiso pa trece mas hende den centro di Oranjestad”.
Nos ta kere cu asina nos por contribui na comercio, door di restaura edificionan, uza nan bek y tambe asina trece mas trafico y cliente den caya pa nos empresarionan, segun e mandatario, kende a indica cu a cuminza pone un cantidad di luz nobo pa trece mas claridad pa Oranjestad, cu ta yuda tambe cu un mihor sentimento di seguridad.
