Anuesca Baly, directora SKOA ta splica:
ORANJESTAD (AAN)—Den entrevista cu Anuesca Baly, directora di SKOA, el a elabora tocante e yudanza cu mayornan di menos recurso, por haya for di diferente instancia pa, por ehemplo, cubri e gastonan di scolgeld.
HIAS ta un di e instancianan aki unda cu mayornan ta acudi cerca nan, y nan ta haya un voucher. E vouchers ta wordo entrega na SKOA y nan ta “verwerk” esaki automaticamente.
Baly a agrega cu HIAS ta duna voucher tambe pa cumpra di uniform escolar pa e muchanan. El a reitera cu si e mayor ta acudi na e instancia y ta cumpli cu tur e rekisitonan, e ta wordo yuda. El remarca cu e yudanza no ta bin cerca e mayor; e mayor tin cu pidi pe, sea na HIAS, Cruz Cora cu tambe ta yuda y VeneAruba cu tambe SKOA tin bon conexion cune. Y DAS cu ta saca su carta na comienzo di aña escolar, y nan ta duna tur informacion na su clientenan, pa nan cumpli cu e condicionnan di e departamento, pa nan por haya yudanza pa nan yiunan.
Anuesca Baly a comenta cu SKOA a pone hopi mas enfasis e ultimo añanan pa duna mas informacion, y a duna entrevista na prensa, pa concientiza mayornan cu e responsabilidad pa un yiu bin scol y cumpli cu tur su rekisitonan, sea di SKOA, Publico, of cualkier otro, e ta responsabilidad di mayor, y no di un instancia pa e muchanan bay scol.
Dunando e informacion aki, SKOA ta spera cu mayornan bira mas conciente pa locual ta enseñanza di nan yiunan. El a comenta cu hopi biaha mayornan ta bisa cu e muchanan tin “leerplicht”. Ta berdad, Anuesca a bisa, pero “leerplicht” ta pa mayor. Mayor tin cu zorg pa e yiu ta inscribi y cumpli cu tur rekisito pa e mucha drenta den scol. Scol tin cu percura pa e alumno haya su les y bon educacion na scol. Y tur otro cos cu no ta regarda scol ta responsabilidad di cada mayor.
