WILLEMSTAD: Tabata Diamars merdia pa atardi, cu Centro Operacional Maritimo (MOC) di Wardacosta di Caribe Hulandes,
a detecta un boto sospechoso cu ta moviendo direccion di Curaçao.
Mesora Centro MOC a saca un unidad rapido di Metal Shark, for di nan sede na Curaçao cu a bay cu tur velocidad rumbo pa e boto ey cu ta yegando pa haci un control.
Pero na mesun momento, Centro MOC a laga e Helicopter di Wardacosta di Caribe Hulandes tambe lanta vuelo y a dirigi su mes pa e area, pa purba na identifica e boto for di halto.
A bin topa cu un boto tipo speedboat cu center-console color blanco, cu dak blauw, y cu un solo outboard engine. Abordo a bin haya 19 persona den e boto chikito aki.
Ta trata di 15 homber di nacionalidad Venezolano, 3 muhe di nacionalidad Venezolano, y 1 homber di nacionalidad Colombiano.
Personal di Wardacosta riba e Metal Shark a mara e boto, y a lastra esaki pa e Pier di Wardacosta na Curaçao, y tur diesnuebe persona indocumenta a ser pasa na Inmigracion di Curaçao pa nan sigui atende cu nan, y prepara pa nan wordo deporta bek.
