Diasabra otro siman tin otro Pop-up Market na San Nicolas
ORANJESTAD (AAN): Despues di 3 edicion exitoso, e entusiasmo no ta baha. Al contrario, e San Nicolas Pop-Up Market ta sigui crece y conkista curason di nos localnan y bishitantenan.
Bao di liderazgo di Minister Geoffrey Wever, nos ta prepara pa un edicion mas. DIARIO a compronde cu esaki lo bay ta otro siman, Diasabra 13 di December, for di 9’or di mainta te 2’or di atardi riba Plaza Lolita.
Cu mas di 40 bendedo local confirma, nos ta warda bo cu un oferta amplio: webo fresco, berdura local, obra di man, juice natural, cuminda cayente, sopi, johnny cakes y hopi mas.
E edicion aki nos lo tin presentacion di Chicas Gaiteras pa entretene e bishitantenan.
Minister Wever den un declaracion a indica: “Mi ta orguyoso y contento pa mira con e Pop-Up Market ta sigui crece. Nos a crea un plataforma unda cu e productor y empresarionan local por topa cu e consumidor, mientras cu nos ta fortalece e curason economico di San Nicolas.”
Bin pasa un dia alegre den ambiente cultural, stimula nos economia local y celebra e union di nos comunidad. Nan ta warda bo.
