ORANJESTAD (AAN): Diasabra 5 di augustus 2023 pa 7 or di mainta tin Santo Sacrificio di misa na Kapel di Alto Vista
y den Kapel di Cas Curason di Maria na San Nicolas (Blue Army Center).
Diasabra mainta pa 6.15 ta resa Santo Rosario “Misterio Gososo”, despues ta sigui cu Salve Regina. 7or ta sigui cu Santo Sacrificio di misa.Ta invita tur fiel y debotonan pa asisti.
Mama Maria ta entercede pa nos na nos Tata Celestial. Papa Francisco ta haci un suplica na mundo pa resa e Santo Rosario. Henter mundo ta den un tempo di crisis grandi. Aki na Aruba ya nos ta sinti e Cambio di Clima.
E cayente di e solo ta afecta nos tur dia. Ban haci un curashi diasabra mainta trempan pa ofrece nos ora y asisti na Santa Misa y resa pa tur esnan cu ta leu di iglesia. Laga nos ta resa pa necesidad di Iglesia Universal, pa Papa Francisco, Obispo Luis Secco, tur sacerdote, Diacono y laiconan cu ta hiba e bon noticia pa e pueblo di Dios.
Pa nos Gobernantenan y tur cu ta carga responsabilidad pa nos pais Aruba. Pa enfermonan den hospital y ta den exterior cu ta busca nan salud. Cu pronto lo regresa na Aruba y gosa di un bon salud. Pa hobennan arubiano y tur cu a presencia dianan di workshop na Portugal. Pa ora nan bolbe cu e spiritualidad sigui propaganda nan enseñansa di fraternidad pa nos hobennan. Pa e aña escolar 2023 -2024 cuminsa cu positividad y prosperidad pa tur loke ta nobo den enseñansa.
