ORANJESTAD (AAN): Prepara pa Santa Misa, cu ta Diasabra awor 6 di augustus den oranan di mainta, tanto na Kapel di Alto Vista como tambe na Kapel di Cas Curazon di Maria. Tur dos ta cuminza pa 7:00 am.
Ta cuminsa pa 6:15 am cu Santo Rosario. Eucaristia ta cuminsa pa 7:00 am.
Prome cu Santo Misa ta resa Santo Rosario pa 6.15 “Misterio Gososo”, despues ta sigui cu Salve Regina. Ta invita e pueblo di Aruba, deboto y fielnan pa asisti na e Santa Rosario prome cu Santo Misa. Cu Mama Maria entersede pa nos na nos Tata Celestial.
Papa Francisco ta haci un suplica na mundo pa resa e Santo Rosario, nos ta den un tempo di crisis grandi. Noticianan for di henter mundo pa unda cu tin inundacionnan di awasero pisa otro parti di mundo temblor ta ocaciona perdida di cas y di famianan.
Guera na Ucrania ta di lamenta, spantoso pa mundo henter. Hesus tene piedad pa mundo henter. Ban tuma un curashi diasabra mainta trempan pa ofrece nos ora, nos oracion y asisti na Santa Misa y resa pa tur esnan cu ta perde caminda di nan Creador.
Laga nos ta resa pa necesidad di Iglesia Universal, pa Papa Francisco, Obispo Luis Secco, tur sacerdote, Diacono y laiconan cu ta hiba e bon noticia pa e pueblo di Dios. Pa nos Gobernantenan y tur cu ta carga responsabilidad pa nos pais Aruba. . Nos gradici Dios cu a manda awacero saludabel pa nos suela seco, Tur mata y palonan di mondi cu nan raisnan ta duna gracia pa awasero bendiciona.
