Vocero di BCI, Maikel Gomes ta invita pueblo pa probecha:
ORANJESTAD (AAN): Diasabra 5 di April proximo, ta bolbe tin “Baki den Bario” na Barcadera. E vocero di Bureau City Inspector, Maikel Gomes, den entrevista cu DIARIO a invita pueblo en general, pa probecha e oportunidad aki, den su ultimo temporada y bin deposita tur nan sushi, na Barcadera, te proximo aviso.
E interes den pueblo ta halto. Gomes a BCI ta haya hopi yamada via Fixi y via telefon, hopi hende ta puntra na unda baki den bario ta tuma luga y ki dia.
“Pero tur informacion ta pasa na radio y via nos facebook. Mi ta kere cu pueblo ta na haltura, y mi ta haci un yamada atrobe na pueblo di Aruba pa probecha di e oportunidad aki. Bin soluciona loke boso tin, envez di bay tira e sushinan den mondi”, Maikel Gomes a remarca.
El a subraya cu BCI ta concientiza pueblo, pero “e ta keda na cada ken, na cada cual”, el a expresa. Esaki den sentido cu nan ta haya melding cu sushi a wordo tira na tal lugar, nan ta bay haci limpi pero su mainta siguiente atrobe mesun situacion.
E ultimo biahanan cu tabata tin baki den bario, nan hasta a rek e ora te traimerdia 1’or y hopi hende mes a bin trece nan desperdicionan, pues e interes tey sigur.
“Awo cu nos sinta cu e minister nobo nos tin wak ki plannan e tin, y di mi parti mi lo pidi pa rek e oranan. A bin tambe e peticion pa cambia e dia envez di Diasabra hacie Diadomingo, y esey tambe lo mi trece padilanti ora cu nos sinta cu Minister Presidente, pa wak si nos por pone un biaha Diasabra y e siguiente Diadomingo. Esun cu no por, Diasabra, por tir’e Diadomingo”, Maikel Gomes a indica.
E tipo di sushi cu hende por benta aki ta practicamente tur cos. Palo, mata, azeta di cuminda, hero, artefactonan electrico etc.
