Cooperacion di tur ciudadano ta necesario na final di 2021 - Cualkier desaroyo inespera di Covid-19 lo ta funesto pa economia - Mundo por ta enfrente e fase mas importante for di inicio di malesa
ORANJESTAD(AAN)- Tin un diferencia grandi entre e forma cu generalmente publico a tene Covid-19 na consideracion na final di 2020 y e forma cu actualmente publico ta tene cuenta cu e presencia continuo di e malesa den comunidad mundial.
Na final di 2021 mundo tabata biba cu e speransa di vacuna pero ainda sumamente impresiona pa e hecho cu Covid-19 tabata un enemigo desconoci pa hende.
Inicialmente na 2020, ora Covid-19 a bati na porta, hende a pensa cu na e momentonan aki ya mundo lo a bolbe na normalidad.
Un pensamento cu no solamente tabata un anhelo, pero tambe basa riba e realidad cu mas tempo pasa pa yega na e normal nobo, mas dificil lo a bira pa hende financia e exigencianan di Covid-19 cu manera cifranan financiero y economico a demostra, tin un impacto enorme riba desaroyonan mundial.
Ora hunto cu expertonan analisa e situacion mundial, por nota cu mundo practicamente no tin espacio pa sigui financia e efectonan di e Coronavirus nobo cu ta mantene mundo den inseguridad.
Na e momentonan aki a keda proba cu e vacunanan tabata eficiente y a haci cu menos hende ta wordo hospitalisa aunke por nota cu e cifra di mortalidad ta keda halto.
Na e momentonan aki tambe, sinembargo, ainda hende no tin tur contesta cu e mester pa un planificacion sin margen grandi di eror.
Cientificonan ta mantene nan bista riba e posibilidad pa variantenan manera a pasa cu e Delta bolbe presenta den e virus cu por sigui conoce cambio y cu hende continuamente por sigui di acerca.
Cientificonan mundialmente ta tene na consideracion tambe cu mundo ta acerca final di 2021, cu ta nifica cu dianan tradicional di fiesta ta dilanti di porta di un mundo, cu sigur na e paisnan desaroya cu tabata tin placa pa e vacuna, a habri porta pa normalidad aunke mundo ainda no conoce normalidad.
Cu entrada di October, ya por considera cu e temporada di dianan di fiesta a cuminsa y un sondeo di plannan ta revela e tendencia local pero tambe internacional, pa mas espacio pa celebracion na 2021 compara cu 2020.
Kico esaki ta nifica? Ainda hende no tin Covid-19 bou control, aunke hende kier actua na un forma cu ta deshaci di prevencion basico manera distancia social, uzo di tapa boca, un grado halto di higiena y menos publico posibel na luganan cu mas chens pa e malesa plama.
E temporada di dianan di fiesta, sinembargo, a produci placa hustamente pa e hecho, cu hende ta biaha mas, ta fiesta mas, ta biba na forma menos controla debi na cantidad di festividadnan den cual hende pa tradicion ta perde peligro for di bista.
E temporada di fiesta 2021 ta bira uno di gran importancia pasobra e mester bira porta pa normalisacion ya cu mundo lo tin problema pa economicamente y financieramente sigui cu e maneho irreal cu Covid-19 a haci necesario.
E normalisacion aki ta exigi responsabilidad di hende cu ya por nota cu a bay perdi.
Mas y mas ta mira hende sin tapa boca. Mas y mas hende kier libertad absoluto pa haci como sifuera nunca Covid-19 no a existi.
Expertonan, sinembargo, ta adverti cu mundo mester sigui vigila y hustamente den flexibilisacion oficial nacional, hende mester carga responsabilidad propio den cual sigur ta conta cu ta mihor pa drenta temporada di fiesta cu e afan pa evita cualkier sorpresa di parti di un virus cu te ainda hende no a logra controla y ta sigui demostra cu e ta un asesino!
