Ta studiando nan patronchi migratorio
ORANJESTAD (AAN): Danki na contactonan ayega na Venezuela, DIARIO a haya informacion cu e Centro di Ecologia di Instituto Venezolano di Investigaciones Científicas (IVIC) ta invita tur interesado pa nan Ciclo di Seminario di Ecologia.
E seminario tin e tema: Es el murciélago cardonero (Leptonycteris curasoae) una especie migratoria en el norte de Suramérica?. Esaki lo keda presenta pa Dr. Jafet M. Nassar di e 'Laboratorio de Biologia de Organismos di e Centro di Ecologia di IVIC.
Fecha: diamars, 11 di februari 2025
Ora: 10:30 AM
Lugar: Auditorio "Carlos Schubert", Centro di Ecologia, IVIC (check abao link online)
Sinopsis di e Seminario
Investigacionnan cientifico a comproba cu dos di e tres especie di raton di anochi (vleerluis) den e genero Leptonycteris (L. nivalis y L. yerbabuenae) ta migratorio na Norte-y Centroamerica.
E raton di anochi, Leptonycteris curasoae, cu ta su pariente cercano, ta distribui panort di Suramerica y tin semehansanan morfologico notabel y un sistema unico di seleccion di pareha y reproduccion. E pregunta ta si e tambe tin un patronchi migratorio.
Estudionan genetico ta indica cu L. curasoae tin un structura genetico modera (FST (ADNmt)= 0,167) y bou (FST (microsatélites)= 0,010) na Venezuela y e islanan ABC.
Un programa di marcacion y recaptura cu mas di 7000 raton di anochi na islanan ABC y panort di estado Falcón a comproba cu nan ta realisa buelonan largo, cubriendo distancianan di 78 km riba lama den un anochi.
Na hopi luga na Venezuela y Colombia, e especie aki ta aparece solamente den cierto temporada, sin cu tin populacionnan residente durante tur aña.
E investigacion aki ta reforza e hipotesis cu un parti di e poblacion di L. curasoae den e 'Cinturón Árido Caribense' ta emigra anualmente na e parti zuid y west di nan area di distribucion.
E expertonan ta propone pa desaroya investigacion multinacional pa determina e patronchi migratorio di e especie aki y diseña strategianan di conservacion cu ta considera su ruta di migracion.
Esnan interesa por accesa e seminario pa medio di e link adhunto: https://meet.jit.si/SeminarioCentroEcologia.
DIARIO lo trece mas informacion relaciona cu e tema aki durante un entrevista cu Dr. Jafet M. Nassar.
