Parlamentario Rocco Tjon, obviamente indigna:
*Un show politico ta loke AVP/Futuro a trece den Parlamento
ORANJESTAD (AAN)-- Parlamentario Rocco Tjon ta haya cu e reduccion di 10% di producto y servicio, proponi Diamars, pa AVP y FUTURO den un amienda, ta mas preocupante ainda pa loke ta concerni Cuerpo Policial.
Rocco Tjon a mustra indigna ora el a bisa cu Diamars siman pasa tabata tin un reunion tocante e incidente lamentable, unda full parlamento a aproba un mocion, y AVP y FUTURO a boga pa mas fondo pa KPA pa nan por tin, entre otro, asistencia pa e personal mes pa e parti psicologico, pa nan haya mas herment, etc. Pero Diabierna ultimo nan a presenta un amienda pa reduci 10% di nan presupuesto.
“Diabierna bo ta entrega un amienda caminda bo kier reduci nan presupuesto cu 10%. Kiermen, cu tur respet, locual bo a haci Diamars den parlamento tabata gewoon un show politico, pero na mesun momento Diabierna, ora e realidad a presenta bo a bin cu un amienda pa reduci nan presupuesto cu 10%. Y Cuerpo Policial ta hopi duidelijk den esaki; cu e reduccion aki lo hisa e riesgonan pa nan personal.
Un reto mas grandi pa cumpli cu obligacionnan internacional, entre otro na Aeropuerto pero tambe e ta papia riba e diferente trayectonan pa desaroyo profesional, pa tur e polisnan ta na peliger. Inversionnan cu a wordo haci caba pa radarnan, pa camaranan, ta na peliger, pasobra mester compronde cu no ta solamente cumpra un radar, un camara, bo ta peg’e awe y bo ta cla. No, e tin un ‘overeenkomst’ pa bay mas aña. Kiermen, ta cierto obligacionnan cu bo ta mara na dje caba, pa servicio, pa tecnologia, cu mester wordo cambia, etc.” Esaki ta loke KPA a indica, Parlamentario Rocco Tjon a comenta.
LAR: E Parlamentario a sigui elabora tocante LAR cu ta un departamento cu tambe ta brinda servicio na nos ciudadanonan, literalmente nan a bisa cu e Departamento aki ta ricibi, door cu ya caba nan ta prioritiza, net suficiente fondo pa nan brinda e servicio. No tin espacio pa reduccion.
Instituto KIA: Tjon a pasa pa KIA, cu ta un organizacion cu tur hende sa cu mester di hopi atencion, y su director ya caba a manda full un documento pa e formadornan. “Pa señor Eman y pa señora Croes, pues nan sa e situacion di KIA, nan sa tambe kico tur ta ongoing aworaki pa nos mehora e situacion y obviamente ta hopi importante pa tin continuidad den esaki”, Tjon a remarca.
“Y nan ta bisa cu un reduccion di 10% lo trece tur e mehoracion cu a ser haci, na peliger. Djis pa nos compronde un rato, esaki ta nifica cu un situacion di trabao peligroso pa e personal, retonan grandi cu nos no por bay cumpli cu obligacionnan internacional, manera ta conoci ora ta trata un prison, un instituto coreccional, nos tin obligacionnan internacional cu nos tin cu cumpli cu ne, pasobra nos ta wordo evalua pa esaki tambe. Anto un reduccion den e presupuesto lo nifica cu nos no por brinda mas e atencion medico necesario pa e detenidonan, e lo nifica tambe cu programanan di resocializacion manera nos tin aworaki den KIA, pa e detenidonan mes, opleidingnan, curso y actividadnan, tur esaki tampoco lo no por sigui. Y por ultimo, esaki ta lo mas erg, eigenlijk nan ta señala cu e reduccion aki, sigur, lo tin como consecuencia cu nos lo bay viola derechonan humano. Esakinan ta señalnan real cu e departamentonan ta manda pa nos” Rocco Tjon a subraya.
