ORANJESTAD (AAN): Diamars 19 di October venidero lo cuminza e nobena na honor di San Hudas Thadeo, “E Santo di Speranza”, patrono di esnan desespera y di casonan dificil.
Nos ta resa tur dia e Santo Rosario na honor di Mama Maria y despues nos ta resa e oracion di nobena na honor di San Hudas Thadeo.
E Santo Rosario mes lo cuminza Diamars dia 19 October, y tur otro dianan pa 6:15 pm, sigui pa un Santo Sacrificio di Misa pa 7:00 pm (excepcion di Diadomingo 24 di October, cu ta pa 7:15 am, sigui pa un Santo Sacrificio di Misa pa 8:00 am.
Diahuebs dia 28 lo ta e fiesta di San Hudas Thadeo. Pa 6:15 pm lo tin un Rosario na honor di Mama Maria y cantica na honor di San Hudas Thadeo, sigui cu Santo Sacrificio di Misa pa 7:00 pm.
Pastoor Jairo Maduro, Pader Jose Navas y Grupo di Oracion San Hudas Thadeo Santa Curz ta invita cordialmente tur deboto di Mama Maria y San Hudas Thadeo y pueblo en general pa asisti na e nobena aki. Nos ta resa pa bendicion y paz pa nos Dushi Aruba cu ta pasando awor den un pandemia y problemanan financiero, etc., pa conversion di pecadornan, crecemento di fe, y tambe pa paz mundial.
Ta pidi tur fielnan pa bin cu e buki di nobena pa resa y canta for di dje.
