ORANJESTAD (AAN) – Diamars un total di 3 barco crusero tabata di bishita na Aruba. Ta trata aki di Mariner of the Seas di Royal Caribbean, tambe Celebrity Equinox di Celebrity Cruises, y Carnival Horizon di Carnival Cruise Lines.
Centro di ciudad tabata yen di hende. Por a mira cantidad di turista na pia canando rumbo pa lama. Otronan a subi bus di Arubus cu ta core e ruta di hotelnan, a tuma e
ruta di L. G. Smith Boulevard completamente yen.
Riba caminda, saliendo di waf, por a mira busnan di entretenimento tambe completamente yen cu turistanan alegre, bisti cu paña colorido tocante hasta maraca. Y den e caya principal mes cantidad di turistanan crusero tabata cana den diferente grupo.
Ora cu e bus a sali, banda di 10.45 am, ya caba tabata tin un rij grandi di turista para dilanti e loket di benta di smart card di Arubus, y por a mira tambe cu hop famia a bin hunto, esta mayornan cu yiu chikito y hoben.
Berdaderamente ta un privilegio cu Aruba ta asina gusta pa tantisimo turista como destino, pa alomenos pasa un dia aki, haci uso di Aruba su beach y lama, cu ta brinda un maraviyoso contraste entre su lama cu diferente tono di blou cu berde y santo blanco di lama.
Danki Dios cu Aruba no a haya awacero fuerte, pero cu e bishitantenan por a goza di un clima masha bon mes, manera un par di turista a comenta den e terminal di Arubus.
Ohala di e cantidad di turistanan crusero cu por a mira Diamars, hopi di nan lo dicidi di bolbe bin Aruba, pero abordo di avion pasa alomenos un siman den e area di hotel, cu ta simplemente espectacular. Ohala, e yegada di un crusero asina grandi y tanto turista cu a dicidi di baha, pisa nos suelo, bay lama, etc., den e oranan ey laga un aporte generoso na Aruba su economia.
