Nada ainda di Yate Energy y su cuatro tripulantenan
ORANJESTAD (AAN): Dia #3 a yega te pasa, y ainda ningun hende a logra localiza ningun naufrago di e yate ‘Energy’ cu a desaparece Diasabra atardi den parti Noordwest basta leu di Aruba.
Diamars mainta trempan, personal di e avion sofistica Dash 8 di Wardacosta di Caribe Hulandes a lanta vuelo, y segun calculo di coriente di lama y biento, a bay bula den direccion di Lama Caribe panort di Alta Guajira di Colombia, pa sigui cu e buskeda di e 4 personanan perdi riba lama, esta Jarred Croes, Aischell Tromp, Marcelo Heyden, y Davey Croes.
Nan focus a sigui riba Colombia, aunke ya di Dialuna tabata buscando den e area panort di costa Caribense di Colombia. E vuelonan aki a wordo haci cu permiso di autoridad Colombiano.
Wardacosta di Caribe Hulandes a confirma tambe cu e barco di Marina Real, esta Zr.Ms. Friesland y su helicopter tambe a yuda cu e buskeda riba Diamars. Nan a keda bula di mainta te atardi, y tabata stop djis pa refuel. Nan a keda bula te despues cu solo baha. Nan tur tin ekipo special cu ta observa obhetonan hasta den scuridad.
Te na ciere di edicion aki di DIARIO, no a drenta ningun informacion nobo di e buskeda pa Yate Energy.
Diferente amigo di e piscadonan perdi tambe a subi lama pa asina keda asisti den e buskeda. Si tur cos ta sigui bon cu tempo, awe kizas nan lo bolbe ta den areanan ta buscando. E potret aki ta di e avion Dash 8 di Wardacosta di Caribe Hulandes.
