Momentonan yen tristeza na ImSan
ORANJESTAD (AAN): Dialuna merdia, e Hunta di Directiva y Management Team di Instituto Medico San Nicolas (ImSan) a confirma e fayecemento di nan director Drs. Joel Rajnherc. Despues di a hiba un lucha grandi cu su salud durante e ultimo aña, y a logra vence cancer, lamentablemente a confronta complicacionnan secundario y Dialuna marduga a ricibi e tristo noticia cu Drs. Joel Rajnherc a bay sosega.
Management Team di ImSan a tuma e decision pa informa personalmente cada un empleado riba Dialuna mainta mirando e conexion personal cu cada un di e empleadonan tabata tin cu e director.
Drs. Joel Rajnherc no tabata sin mas un director, e tabata un persona cu tabata stima cada un di su empleadonan directamente. E tabata conoce cada un di nan directamente den un forma unico y semper tabata pendiente pa cada un di nan.
Drs. Joel Rajnherc tabata un lider excepcional y un mentor cu un vision enorme pa locual ta trata salubridad y cuido medico na Aruba en general, pero primordialmente e tabata e curason pa cu nos hospital Instituto Medico San Nicolas ImSan.
Drs. Joel Rajnherc a sa di dedica añanan largo di servicio medico na e comunidad di Aruba como pediatra inicialmente y consecuentemente como director di nos hospital Institute Medico San Nicolas ImSan caminda cu el a sa di toca y influencia bida di hopi persona den un forma unico. Drs. Joel Rajnherc ta laga un legado enorme atras, no solamente pa cu e comunidad di Aruba, pero tambe sigur pa cu e famia completo di nos hospital, Instituto Medico San Nicolas ImSan, cu sin duda lo sa di carga y continua cu esaki cu integridad, perseverancia y cu amor pa cu e comunidad di Aruba.
“Nos director Drs. Joel Rajnherc ta laga un bashi inmenso atras,” ta loke nan a declara.
Hunta di Directiva y Management Team di Instituto Medico San Nicolas ImSan ta manda palabranan di forsa y sincero pesame na su señora Sandy, su yiunan Cassandra (Sam) y Joel (Riven), demas famia y tambe na e famia completo di nos hospital Instituto Medico San Nicolas ImSan.
