Prome Minister Evelyn Wever-Croes:
ORANJESTAD (AAN): Dialuna lo trata e ley Landsverordening Normering Topinkomens (LNT), e asina yama Wever-Croes Norm. Esaki ta un condicion di Hulanda pa Gobierno por paga e 5% na empleadonan publico na juli proximo.
Premier Wever-Croes a duna di conoce den rueda di prensa cu den parlamento kier pasa un ley cu no ta perhudica ningun hende. Pero e realidad di bida ta cu Parlamento ta e organo di mas halto den Constitucion, ni den bida ni den Parlamento por complace tur hende tur ora.
E ley cu tin den Parlamento ta un ley cu a bin pa frena un situacion cu a sali fo'i man. "Ora cu gobierno a independisa cierto servicionan di awa, coriente, internet, telefon, hamas tabata e intension pa un director un dia por bay gana tres, cuatro biaha mas hopi c'un minister".
E mandatario a señala cu ora tin un compania estatal cu ta duna servicio basico na pueblo, nan mester percura pa nan salarionan no ta exhorbitantemente halto. Claro cu tin cu paga e hendenan bon, pero no di mas tampoco.
Si ta paga nan rond di 7 mil pa 9 mil Florin esey ta hopi bon y ta mescos c'un salario di un parlamentario. Pero 50 mil Florin, 60 mil Florin, esey no ta necesario. "Awo, si ta bo compania priva, ningun hende por bisa bo nada con tal bo paga belasting. Pero compania di gobierno mester zorg pa e servicio cu ta wordo duna ta na e prijs mas abao y si bo hisa salarionan, e prijs cu bo ta brinda e servicio, cu no ta di bo, ta di pueblo, tambe ta subi, anto esey no ta e intension", Evelyn Wever-Croes a expresa.
Parlamento aworaki tin un evaluacion pa bay haci. Di un banda, e ley aki ta afecta esnan cu ta gana mas di 18 mil pa 19 mil Florin pa luna cu ta traha na compania estatal ya cu nan salario ta bay wordo afecta.
Cuanto e personanan aki ta? 20 pa 30 hende kisas. Pero na otro banda mester tin un balansa ya cu ta miles di empleadonan publico cu no ta gana 18 mil ni 20 mil florin. Un ambtenaar ta gana 3mil, 4 mil of 5 mil y por ta 7 mil como hefe di departamento, a bisa.
Miles di hende cu e salario ey ta core un riesgo sino pasa e ley di LNT. E ley lo wordo trata den Parlamento Dialuna awor.
