Director di FCCA, Julie Wever:
- Esaki ta e campaña ‘Yabi den bo man’
ORANJESTAD (AAN)-- Señora Julie Wever, Director di FCCA, den entrevista cu DIARIO a duna di conoce, cu tur cos ta cla pa Dialuna 17 di Augustus awo, cuminza cu e aplicacion pa e 20 casnan nobo y proyecto nobo na Tanki Leendert.
“Nos a lanza nos campaña ‘yabi den bo man’ ofreciendo binti cas na nos comunidad, y e ta habri online, Dialuna 17 di Augustus awor, pa 9’or di mainta. Dus, nos a haci un recorido tambe pa purba concientiza tur hende di e campaña aki, pa nan ta prepara cu nan documentonan pa Dialuna nan por load nan off. Kiermen, e boton, eigenlijk pa registra, aplica pa e campaña aki pa bo por bin na remarke pa bo por logra cumpra bo cas ta habri, anto e ora ey bo tin cu inscribi, anto nos ta bay trata, conforme esun cu a inscribi prome, nos ta bay trata e prome verzoek tambe.”
“Tur hende por aplica pa e proyecto aki; naturalmente, bo mester tin bo documentonan na man. Otro aspecto importante ta pa bo por cualifica financieramente pa bo por carga e hipoteca, y tambe e mester ta bo prome hogar. Esey ta e rekisitonan cu nos ta pidi, y bo mester pasa tambe un screening, como normalmente caba, ta parti di bin na remarca y e solicitud di un hipoteca.
Señora Julie Wever a splica cu e lista di spera cu tin na FCCA y e proyecto aki ta dos aspecto diferente cu loke hende ta warda. “Nan ta wardando pa un cas di huur. Un cas social eigenlijk, pero esey no ta kita cu si den e lista ey tin hende ta wak cu nan tambe por cumpra un cas, nan por inscribi tambe online, Dialuna mainta, 9’or exactamente” señora Wever a señala.
E proyecto aki ta dirigi na ciudadanonan Arubiano residente di Aruba, locual ta hopi importante. “Y asina nos ta cualifica caba nos hipotecanan. Pues ora hendenan ta bin akinan, nos ta duna hipoteca solamente na hendenan residente. E campaña aki ta pasobra nos kier yuda baha e scarcedad, eigenlijk, cu tin riba mercado. Nos a haci e campaña aki, cu ta bo prome cas. Pues no cu bo tin dos, tres cas of un cas caba, esey no ta e idea di esaki. Djis nos kier pa e solucion di e problematica cu tin al momento, y FCCA ta wak su mes yama tambe, pa por ta e solucion pasobra nos tey, akinan, pa nos localnan”, Julie Wever, director di FCCA, a reitera.
