Lider di fraccion AVP a reuni cu Premier Jetten:
ORANJESTAD (AAN): Lider di fraccion di AVP, Jennifer Arends-Reyes, recientemente a participa den un encuentro cu Su Excelencia Rob Jetten durante su prome bishita oficial na Caribe Hulandes. Señora Arends-Reyes a expresa su aprecio pa e echo cu Prome Minister Jetten a scoge pa bishita e partinan Caribense di Reino na comienso di su periodo como Prome Minister di Hulanda. Segun e parlamentario, e decision ey ta manda un señal importante tocante e balor cu Hulanda ta pone riba comunicacion directo, cooperacion y comprondemento mutuo den Reino Hulandes.
Arends-Reyes a indica cu bishitanan manera esaki ta esencial pa fortalece e lazonan historico, institucional y humano entre e paisnan di Reino. “Un relacion fuerte mester ta riba presencia, dialogo y compromiso sincero. E echo cu Prome Minister Jetten a tuma e iniciativa pa bishita nos region asina lihe den su mandato ta un señal positivo pa futuro di cooperacion dentro di Reino,” segun Sra. Arends-Reyes.
Durante e encuentro, e partidonan a sostene un dialogo habri, constructivo y serio riba diferente tema di importancia pa Aruba y pa nos region den medio di un escenario internacional cu ta cambia rapidamente. Entre e topiconan discuti tabatin e situacion geopolitico actual y e desaroyonan reciente relaciona cu Venezuela, incluyendo e posibel impacto cu instabilidad regional por tin riba siguridad, economia y bienestar di nos comunidadnan.
Sra. Arends-Reyes a enfatisa cu Aruba y e otro paisnan Caribense di Reino mester sigui traha cu un enfoke preventivo, responsabel y coordina pa enfrenta e diferente retonan cu nos region por confronta den futuro cercano. Den e contexto ey, e parlamentario a destaca cu cooperacion efectivo dentro di Reino ta mas importante cu nunca.
Ademas, durante e combersacion a intercambia punto di bista riba prioridadnan principal pa Aruba, incluyendo fortalecemento economico, diversificacion di entrada economico, sostenibilidad y creacion di oportunidadnan pa nos hendenan, specialmente pa nos hubentud. Segun Sra. Arends-Reyes, Aruba mester continua inverti den innovacion, desaroyo sostenibel y creacion di empleo, sigurando cu crecemento economico ta bay man den man cu proteccion di medio ambiente y bienestar social.
“Nos pueblo merece un futuro stabiel, resiliente y cu oportunidadnan real pa progreso. Pa logra esaki, dialogo, cooperacion y liderazgo responsabel ta indispensabel,” segun Sra. Arends-Reyes.
Finalmente, e lider di fraccion di AVP a expresa su speransa cu e impresion cu Prome Minister Jetten ta hiba bek despues di su bishita na Caribe lo ta uno positivo, duradero y efectivo, contribuyendo na un miho comprondemento di e realidadnan, necesidadnan y potencial cu Aruba y nos region tin pa ofrece dentro di Reino Hulandes.
AVP ta reafirma su compromiso pa sigui defende interesnan di Aruba y promove cooperacion constructivo cu tur partnernan relevante, semper cu bienestar di pueblo Arubano como punto central.
{gallery}Dialogo constructivo riba siguridad, cooperacion y futuro economico di Aruba{/gallery}
