Na Biblioteca Nacional Aruba:
ORANJESTAD (AAN): Diahuebs, 30 di januari 2025, di 6.00 pa 8.30 p.m. lo tin presentacion di e buki IDOOR and others, Aruba’s Aviation History 1923-1950, di e autor Mauricio Boekhoudt, na Biblioteca Nacional Aruba, Oranjestad.
Mauricio Boekhoudt, IAP, ta un persona cu un trayectoria impresionante den aviacion. Un persona cu mas di 45 aña di experiencia den aviacion. Mauricio a cuminsa como controlador di trafico aereo na Aeropuerto di Aruba y a termina su carera profesional como consehero strategico na Aruba Airport Authority NV.
For di comienso di Mauricio su carera den aviacion el a ripara cu poco ta conoci di e historia di aviacion di Aruba. Esaki a conduci Mauricio pa cuminsa cu investigacion profundo. Resultado di dicho investigacion a haci posibel publicacion di e buki aki, IDOOR and others: Aruba’s Aviation History 1923-1950.
Historia di Aviacion di Aruba di 1923 pa 1950 tabata domina pa e servicionan experimental di KLM na ‘Dutch West Indies’.
Na cuminsamento tabata uza un parti duro di e beach na costa seit di Sabaneta como pista di aterisahe y subida di e avionnan. Sinembargo, despues di tempo a urgi gobierno pa construi un aeropuerto na parti west di Oranjestad.
E prome servicionan organisa entre Corsou y Aruba a cuminsa 19 di januari 1935. Aruba a bira un hub pa KLM na ‘West-Indies’, mientras cu aviacion comercial na Aruba a progresa rapidamente.
Na 1939 Aruba tabatin conexion aereo cu Trinidad, Barbados, Maracaibo, Barranquilla, Boneiro, Coro y La Guaira. E mesun aña Aruba tabatin conexion aereo cu Pan American Airways cu ruta transatlantico cu Amsterdam via Port Washington na Long Island, New York. Y di aki ta continua pa Lisboa y Marseille atrabes di Horta, Azores. Entre 1944 y 1948 Aruba tabatin conexion aereo directo cu Port-au-Prince (Haiti), Camaguey (Cuba) y Miami (USA).
Riba 4 di juni 1942 a inaugura e di dos terminal di aeropuerto ‘Dakota’ na Aruba.
Na 1945 a cuminsa cu preparacion pa construccion di e di tres edificio di terminal di aeropuerto na Aruba. 18 di maart 1950 a inaugura e terminal nobo di aeropuerto.
Pues e buki aki ta trata parti di herencia y desaroyo di historia di aviacion na Aruba di 1923 pa 1950.
