ORANJESTAD (AAN) -- “Manera nos a bisa, nos ta enfoca nos mes pa soluciona problemanan den caminda, y despues sigui den direccion, e rumbo, e maneho, e beleid, pa cu enseñanza den su totalidad”,
Minister di Enseñanza y Deporte, Endy Croes, a señala den conferencia di prensa, Dialuna, refiriendo tambe, na e instructornan di les di landamento escolar.
El a bisa cu riba e tema aki, siman pasa el a papia di dje caba indicando cu a yega caba na solucion, riba e aspecto di con ta bay paga nan den futuro, coloca nan bek bao di DPS, nan lo bay bek na e contrato anterior cu nan tabata tin, y gobierno a compromete pa garantiza esaki.
“Manera ta conoci, den e sistema di DRH (payroll ) bo mester ta introduci na e sistema corecto, prome cu cierto fecha pa bo por cobra fin di luna. Nos tin un entendi cu esaki ta e caso y cu pa fin di October nan lo cuminza cobra bek di acuerdo na e contrato anterior, di caso 28 aña, cu nan conoce”, e mandatario a subraya.
“No obstante esey, nos a resolve otro problema pasobra e muchanan no por a continua cu les di landamento, comokiera cu no tabata tin fondo aloca, pa por paga e transporte pa hiba e muchanan les y trece nan bek scol.
“Nos a logra di nos mesun presupuesto yega na e fondonan necesario, cu ta toch un suma cuantioso, algo riba 300 mil florin, pero a firma tur e documentonan aki y nos a percura y nos a haya confirmacion un rato pasa, prome cu nos a caba di drenta na e conferencia di prensa aki, y tin e primicia cu dia 14 di October di e siman aki, e lesnan di landamento ta cuminza y e busnan ta cuminza core y nos por tin e instructornan, mayornan, docente y alumnonan contento, y mas cu claro boso servidor, minister, tambe ta contento cu e parti aki”, e mandatario a expresa.
