ORANJESTAD (AAN): Esnan cu tin stamina, den bon condicion, y sa con pa cana den mondi,
sigur lo ta apto pa participa den e asina yama ‘Rough Hike’, cu Aruba Conservation Foundation un biaha mas ta organizando Diadomingo venidero den Parke Arikok.
Nan a splica, cu e caminatanan fuerte aki, ta dunabo un chens pa ‘conecta cu naturalesa’ di cerca bao guia di un Park Ranger, y di e forma ey bo ta uni cu naturalesa.
E caminata aki yama ‘Rough Hike’, lo bay ta hopi trempan mes! E lo sali pa 5:45 am, y lo dura te banda di 9:00 am. Lo bay ta canando 6,75 kilometer den naturalesa.
Lo bay cuminsa na Centro di Bishitante di Parke Nacional Arikok, y asina lo pasa y explora e Visitor Center, Miralamar, Jamanota, Masiduri, Rooi Taki, y Spaans Lagoen unda e lo finalisa. Aruba Conservation Foundation lo suministra Bus pa asina trece tur hende bek for di Spaans Lagoen pa e Visitor Center.
E ‘Rough Hike’ aki lo bay ta Diadomingo 8 di September 2024, y corda bon pa registra na tempo. Pa bo registra, tin di haci esaki online na e website aki:
Un chens unico pa aprecia e bunitesa di naturalea na un forma respetuoso y conciente. E caminata aki lo inclui un pasaboca chikito y algo pa refresca. Pero ta pidi pa bo trece suficiente awa, y bin cu zapato of keds adecuado na pia.
Nan lo cobra pa bo participa, y prijs ta basa si acaso bo ta un miembro di Parke, of no-miembro, y tambe tin prijs special pa turista. Muchanan bao di 17 aña tin un prijs special tambe. Bo tin di paga entre 9:00 am y 9:30 am na e Visitor Center na final. Mas detaye riba e website menciona na halto.
E caminata aki ta pa hende di tur edad, tanten cu bo por cana e distancia, por cu subida, y por keda riba e “tempo” di grupo. Por fabor tuma na cuenta cu e caminata aki ta ‘rough’, pues lo tin subidanan dificil. Tene esaki na mente ora di registra. Espacio ta limita, pues registra rapido prome cu e yena.
