POH Jasmira Mora:
ORANJESTAD (AAN) Diadomingo 17 di Mei venidero, ta Dia Mundial di Hipertension, y e grupo di POHnan di Aruba ta para keto riba e pashentnan cu ta sufri di e malesa cronico aki, esta presion arterial halto.
POH, señora Jasmira Mora, Coordinador di e Servicio di POH, a splica cu un malesa cronico ta un malesa cu e pashent tin cu bay biba cu ne pa bida largo.
“Pa nos ta hopi importante cu esnan cu tin e malesa aki keda controla, bay bo docter di cas. Nos tin pashentnan cu enberdad ta bebe nan remedi, esey ta di elogia, e ta hopi bon pero e problema ta cu si bo no bay bek na bo POH, of na bo docter di cas pa haci bo controlnan, nos no sa si e pildora, enberdad, ta haciendo su trabao manera cu mester ta”, Jasmira Mora a expresa.
Mora a splica cu tin hende cu tin 10 of 15 aña tumando e mesun pildora pa hipertension y no ta bay bek pa control. “Esey ta lastima pasobra nos no sa si e remedi ta haciendo su trabao si of no, si mester ahusta e dosis, si nos tin cu bah’e of por ta subi’e. Den mayoria caso ta’asina importante si bo ta tumando bo remedi y bo kier aporta na bo mesun salud, pa ta sigur cu bo ta haciendo esey na manera corecto.
Locual nos tambe ta pone hop enfasis riba dje ta pa bo busca un machine, anto bo mes por haci e control den e trankilidad di bo cas”, Jasmira Mora a trece dilanti.
El a agrega cu ta hopi bon pa e pashent pidi su POH p’e yuda bo y mustra bo tambe con pa check bo presion manera cu mester ta. Esaki tambe ta importante pasobra tin hende cu no ta controla su presion na cas, na e manera corecto.
Ademas e ta aconseha pa tin pildora di presion tambe na trabao, pasobra tin biaha ora di sali den pura bay traha, e persona ta lubida di tuma su remedi.
